چیئرمین واپڈا لیفٹیننٹ جنرل (ر) سجاد غنی نے بھارت کو دو ٹوک اور سخت پیغام دیتے ہوئے کہا ہے کہ اگر بھارت نے پاکستان کا پانی روکنے کی کوشش کی تو یہ اقدام "ایکٹ آف وار” تصور ہوگا اور ایسی صورت میں پاکستان کے پاس ملٹری آپشن کھلا ہوگا۔
کراچی میں صحافیوں سے گفتگو کرتے ہوئے چیئرمین واپڈا کا کہنا تھا کہ پاکستان اپنے آبی حقوق پر کسی قسم کا سمجھوتہ نہیں کرے گا۔ انہوں نے واضح کیا کہ پانی روکنے کی کوئی بھی کوشش ایک جارحانہ اقدام ہو گی، جس کا بھرپور جواب دیا جائے گا۔لیفٹیننٹ جنرل (ر) سجاد غنی نے کہا کہ بھارت کے پاس دریائے چناب اور دریائے سندھ پر پانی روکنے کی محدود صلاحیت ہے، تاہم اگر بھارت ایسا کرنے کا سوچ رہا ہے تو اس کے لیے اسے نہ صرف وقت درکار ہوگا بلکہ غیر معمولی وسائل کی ضرورت بھی پڑے گی۔انہوں نے کہا کہ پاکستان عالمی سطح پر بھی اس معاملے کو مسلسل اجاگر کرتا رہا ہے اور انڈس واٹر ٹریٹی کے تحت اپنے حقوق کی حفاظت کے لیے ہر ممکن سفارتی، قانونی اور تکنیکی اقدامات اٹھا رہا ہے۔
چیئرمین واپڈا نے زور دیتے ہوئے کہا کہ بھارت کے ان ارادوں کو شکست دینا ضروری ہے، کیونکہ یہ صرف پانی کا نہیں بلکہ پاکستان کی خودمختاری اور سلامتی کا مسئلہ ہے۔ ان کے بقول "ہماری پالیسی واضح ہے، پانی روکنے کو جارحیت سمجھا جائے گا اور ہم اس کا جواب دینے کا حق محفوظ رکھتے ہیں، چاہے وہ سفارتی ہو یا عسکری۔”
