اوچ شریف (باغی ٹی وی، نامہ نگار حبیب خان) بنگلہ مستوئی روڈ کے قریب بستی ماسٹر منظور کے مقام پر موٹر سائیکل حادثے میں ایک خاتون اور ان کی دو سالہ بیٹی زخمی ہو گئیں۔ حادثہ اس وقت پیش آیا جب موٹر سائیکل کے ٹائر میں کپڑا پھنس جانے کے باعث گاڑی عدم توازن کا شکار ہو کر گر گئی۔
زخمیوں کی شناخت فاطمہ بی بی زوجہ عبدالرؤف (عمر 32 سال) اور ان کی دو سالہ بیٹی نفیسہ بی بی دختر عبدالرؤف کے طور پر ہوئی ہے، جو موضع نور والا، بستی ماچھی کے رہائشی ہیں۔ حادثے کے نتیجے میں فاطمہ بی بی کو پیشانی پر معمولی چوٹیں آئیں جبکہ ننھی نفیسہ کے چہرے پر متعدد خراشیں اور زخم آئے۔
ریسکیو ٹیم نے موقع پر پہنچ کر فوری طبی امداد فراہم کی اور زخمی ماں بیٹی کو رورل ہیلتھ سینٹر (RHC) اوچ شریف منتقل کر دیا، جہاں ان کا علاج جاری ہے۔ ڈاکٹروں کے مطابق دونوں کی حالت خطرے سے باہر ہے۔
