ڈیرہ غازیخان (باغی ٹی وی رپورٹ) بری شاہ سے دری میرو روڈ پر ساڑھی والا کے قریب ایک افسوسناک ٹریفک حادثہ پیش آیا، جہاں ایک تیز رفتار کار بے قابو ہو کر سڑک کنارے درخت سے جا ٹکرائی۔ حادثے کے نتیجے میں گاڑی میں سوار چار افراد زخمی ہو گئے۔
ریسکیو 1122 کے ترجمان کے مطابق حادثے کی اطلاع شام 6 بج کر 25 منٹ پر کنٹرول روم کو موصول ہوئی، جس پر فوری کارروائی کرتے ہوئے امدادی ٹیم روانہ کی گئی۔ ریسکیو ٹیم نے موقع پر پہنچ کر دیکھا کہ کار بری طرح تباہ ہو چکی تھی اور چاروں افراد زخمی حالت میں موجود تھے۔
زخمیوں میں ایک شخص کی دونوں ٹانگوں کی ہڈی (فیمر) ٹوٹ چکی تھی، جب کہ دوسرے کو سینے پر شدید چوٹیں آئیں۔ باقی دو افراد کو معمولی چوٹیں لگی تھیں، تاہم خوش قسمتی سے تمام افراد ہوش میں تھے۔
ریسکیو اہلکاروں نے تمام متاثرین کو موقع پر ابتدائی طبی امداد فراہم کرنے کے بعد علامہ اقبال ٹیچنگ ہسپتال ڈیرہ غازیخان منتقل کر دیا، جہاں ان کی حالت خطرے سے باہر بتائی جا رہی ہے۔
