پاکستان اور چین کے درمیان 5 سالہ ٹیکنالوجی و مہارت کا تاریخی معاہدہ
ایس آئی ایف سی کے تحت پاک-چین صنعتی تعاون میں اہم پیش رفت سامنے آئی ہے،پاکستان اور چین کی دو اہم تنظیموں کے درمیان 5سالہ ٹیکنالوجی منتقلی کا تاریخی معاہدہ طے پایا، پاکستان انڈسٹریل سیونگ مشینز امپورٹرز اینڈ ڈیلرز ایسوسی ایشن(پسمیڈا) اور چینی تنظیم(گوانگ ڈونگ شو میکنگ مشینری ایسوسیشن) کے درمیان معاہدے پر دستخط ہوئے،اس معاہدے کا مقصد جوتا سازی، چمڑے اور گارمنٹس شعبے میں جدید مشینری متعارف کرانا ہے،وائس چیئرمین(پسمیڈا )محمد یاسین نے چین میں منعقدہ عالمی نمائش "جسما ” میں پاکستان کی نمائندگی بھی کی
وائس چئیر مین (پسمیڈا)محمد یاسین کا کہنا ہے کہ یہ معاہدہ ایک تاریخی سنگ میل ہے جو پاکستان کی متعدد صنعتوں کے لئے بے پناہ فوائد فراہم کرے گا، اس موقع پر اعلیٰ سطحی ملاقاتوں میں پاک چین تعاون اور اسٹریٹجک ترقی کے مواقع پر تبادلہ خیال کیا گیا،ایس آئی ایف سی کی معاونت سےجدید ٹیکنالوجی سے ہم آ ہنگ تربیت کے ذریعے پاکستانی لیبر مارکیٹ میں بہتری کے آثارپیدا ہوں گے
