سیالکوٹ (باغی ٹی وی، بیوروچیف شاہد ریاض)تھانہ بمبانوالہ کی حدود میں سی سی ڈی سرکل ڈسکہ کے سب انسپکٹر جمشید اختر کی قیادت میں پولیس ٹیم پر فائرنگ کے دوران دو خطرناک ڈاکو اپنے ہی ساتھیوں کی گولیوں کا نشانہ بن کر ہلاک ہو گئے۔
ایف آئی آر کے مطابق سب انسپکٹر جمشید اختر اپنی ٹیم کے ہمراہ گوئندکے روڈ پر موجود تھے کہ اس دوران دو موٹرسائیکلوں پر سوار پانچ مشتبہ افراد کو روکا گیا۔ ملزمان نے پولیس پارٹی پر اندھا دھند فائرنگ کرتے ہوئے قریبی کھیتوں کی طرف فرار کی کوشش کی اور مختلف اطراف سے فائرنگ کرتے رہے۔
جوابی کارروائی کے بعد فائرنگ رکنے پر دو ملزمان — ذوہیب اور شفاقت عرف اسحاق گجر — مردہ حالت میں پائے گئے، جو اپنے ہی ساتھیوں کی فائرنگ سے جاں بحق ہوئے۔ ہلاک ڈاکوؤں کے خلاف ڈکیتی، رہزنی اور دیگر جرائم کے سو سے زائد مقدمات درج تھے۔
پولیس نے جائے وقوعہ سے اسلحہ اور دیگر شواہد جمع کر کے تفتیش کا دائرہ وسیع کر دیا ہے، جبکہ فرار ملزمان کی گرفتاری کے لیے چھاپے مارے جا رہے ہیں۔
