اوچ شریف (باغی ٹی وی، نامہ نگار حبیب خان) ڈسٹرکٹ پولیس آفیسر بہاولپور محمد حسن اقبال نے تھانہ اوچ شریف میں کھلی کچہری کا انعقاد کیا، جس میں اہل علاقہ کی بڑی تعداد نے شرکت کی۔ ڈی پی او نے شہریوں کے مسائل سنے اور انفرادی طور پر متعلقہ افسران کو فوری قانونی کارروائی اور واپسی رپورٹ کے احکامات جاری کیے۔
ڈی پی او نے کہا کہ کھلی کچہری کا مقصد شہریوں کو ان کی دہلیز پر انصاف کی فراہمی اور تھانہ سطح پر میرٹ پر فوری دادرسی کو یقینی بنانا ہے۔ کھلی کچہری میں ایس ڈی پی او احمد پور شرقیہ، ایس ایچ او اوچ شریف سمیت دیگر افسران شریک ہوئے۔ ڈی پی او نے افسران کو شہریوں کے ساتھ خوش اخلاقی اور قانون کے دائرے میں خدمت کی ہدایت دی۔
شہریوں نے کھلی کچہری کے انعقاد کو سراہتے ہوئے کہا کہ ڈی پی او کی براہِ راست شرکت سے ان کے اعتماد میں اضافہ ہوا ہے اور فوری احکامات سے مسائل کے حل کی راہ ہموار ہوئی ہے۔ آخر میں ڈی پی او نے شہریوں کی بھرپور شرکت پر ان کا شکریہ ادا کیا۔
