ننکانہ صاحب (باغی ٹی وی،نامہ نگاراحسان اللہ ایاز)ننکانہ صاحب کے علاقے ہیڈ بلوکی روڈ پر تیز رفتار رکشہ اور ٹریکٹر ٹرالی کے درمیان خوفناک تصادم کے نتیجے میں ایک نوجوان جاں بحق جبکہ 6 افراد زخمی ہو گئے۔
ریسکیو ذرائع کے مطابق حادثے کی اطلاع ملتے ہی امدادی ٹیمیں فوری طور پر جائے وقوعہ پر پہنچ گئیں اور زخمیوں کو ابتدائی طبی امداد کے بعد قریبی اسپتال منتقل کر دیا گیا۔ حادثے میں جاں بحق ہونے والے نوجوان کی شناخت 20 سالہ عدنان ارشد کے طور پر ہوئی ہے۔
زخمی ہونے والوں میں 60 سالہ صغراں بی بی، 27 سالہ شاہزیب، 12 سالہ نور، 30 سالہ وقاص، 25 سالہ کلثوم اور 2 سالہ اویس شامل ہیں، جنہیں طبی امداد فراہم کی جا رہی ہے۔
پولیس کے مطابق ابتدائی تحقیقات میں حادثے کی وجہ تیز رفتاری کو قرار دیا گیا ہے جبکہ واقعے کی مکمل تحقیقات جاری ہیں تاکہ ذمہ داران کا تعین کیا جا سکے۔ حادثے کے بعد علاقے میں افسوس کی فضا قائم ہے۔
