سیالکوٹ (باغی ٹی وی، سٹی رپورٹر مدثر رتو) وزیر اعلیٰ پنجاب مریم نواز شریف کی خصوصی ہدایت پر اقلیتی برادری کے لیے تاریخی مالی امدادی اقدام کے تحت سیالکوٹ میں 70 ہندو خاندانوں کو ہولی تہوار کے موقع پر فی کس 15,000 روپے کی مالی امداد فراہم کی گئی۔ یہ امداد اقلیتی امور کے معاشی منصوبے کا حصہ ہے، جس کا مقصد ہندو برادری کو مذہبی تہوار کے موقع پر حکومتی سرپرستی مہیا کرنا ہے۔
تقریب رکن صوبائی اسمبلی چوہدری فیصل اکرام کے رابطہ دفتر میں منعقد ہوئی، جس میں ہندو کمیونٹی کے معزز عمائدین سائیں اُداس، شادی لال اور دیگر افراد نے شرکت کی۔ انہوں نے وزیر اعلیٰ پنجاب کے اس فراخدلانہ اقدام پر اظہار تشکر کیا اور اسے اقلیتوں کے لیے قابلِ تقلید مثال قرار دیا۔
اس موقع پر چوہدری فیصل اکرام نے گفتگو کرتے ہوئے کہا کہ وزیر اعلیٰ پنجاب کی ہدایت پر صوبے بھر میں اقلیتی برادری کی فلاح و بہبود کے لیے اربوں روپے کے فنڈز مختص کیے جا چکے ہیں۔ یہ تاریخی معاشی پیکیج نہ صرف اپنی نوعیت کا پہلا اقدام ہے بلکہ یہ اقلیتوں کے مذہبی و سماجی حقوق کی مکمل ترجمانی بھی کرتا ہے۔
انہوں نے مزید کہا کہ پنجاب حکومت کے یہ اقدامات بین المذاہب ہم آہنگی، رواداری اور اقلیتوں کو قومی دھارے میں شامل کرنے کے عزم کی عملی تصویر ہیں۔ ہولی جیسے تہواروں میں حکومت کی شراکت داری اقلیتوں کے دل جیتنے کے مترادف ہے، جو پاکستان کے آئین اور سماجی اقدار کے عین مطابق ہے۔
