پاکستان میں سعودی سفارت خانہ کے شعبہ الملحق الدینی کے نمائندہ خصوصی وایڈیشنل ڈائیریکٹر انٹر نیشنل لنکجز اسلامیہ یونیورسٹی بہاول پور ڈاکٹر حافظ مسعودعبد الرشید اظہر نے وفد اعلیٰ سطحی وفد کے ہمراہ وائس چانسلر اسلامیہ یونیورسٹی بہاولپور ڈاکٹر کامران سے ملاقات کی اور انھیں یونیورسٹی کے وائس چانسلر کا منصب سنبھالنے پر دل کی اتھاہ گہرائیوں سے مبارکباد پیش کی ، پھولوں کا گلدستہ پیش کیا اور امید ظاہر کی کہ ان کی قیادت میں یونیورسٹی عالمی رینکنگ تک پہنچے گی۔ ڈاکٹر حافظ مسعود عبدالرشیداظہر نے ڈاکٹر کامران کو ماضی قریب میں المجلس الاسلامی باکستان، کلیة القرآن الکریم والتربیة الاسلامیة اور سعودی حکومت کے تعاون سے یونیورسٹی میں تعمیر کردہ تقریباََ چار کروڑ کی لاگت سے ایک ہزار نمازیوں کی گنجائش رکھنے والی پر شکوہ مسجد جامع ابن کثیر سمیت مختلف پراجیکٹ کے بارے میں تفصیلی بریفنگ دی اور وہ پراجیکٹس جو سعودی حکومت کی طرف سے منظور ہونے کے باوجود ابھی تک یونیورسٹی میں شروع نہیں کیے جاسکے ،ان پر بھی تفصیلی تبادلہ خیال ہوا۔ وائس چانسلر ڈاکٹر کامران نے رکے ہوئے پراجیکٹس از سر نو شروع کرنے پر زور دیا جس پر ڈاکٹر حافظ مسعودعبدالرشید نے کہا میں ابنائے جامعہ میں سے ہوں میری شدید خواہش ہے کہ میں اپنی مادر علمی کی خدمت کروں۔ ڈاکٹر کامران نے اسلامیہ یونیورسٹی میں سیرت چیئر کی مستقل بلڈنگ کی ضرورت پر بھی زور دیا جس پر ڈاکٹر حافظ مسعود اظہر نے کہا ہم یونیورسٹی کو ڈیلیور کرنا چاھتے ہیں۔ڈاکٹر کامران نے سعودی حکومت کے تعاون سے اسلامیہ یونیورسٹی میں مکمل کئے گئے پراجیکٹس پر سعودی حکومت کا شکریہ ادا کیا اور ڈاکٹر حافظ مسعود اظہر کو خراج تحسین پیش کرتے ہوئے کہا کہ یونیورسٹی کو آپ جیسے ہونہار طالب علم پر فخر ہے۔رئیس المجلس الاسلامی ڈاکٹر حافظ مسعود اظہر نے ڈاکٹر کامران کو کنگ فہد قرآن کمپلکس کے طبع شدہ درجنوں اردو ترجمہ وتفاسیر والے قرآن مجید پیش کیے ۔ ڈاکٹر حافظ مسعود اظہر کے ہمراہ وفد میں معروف سکالر پروفیسر ڈاکٹر حافظ عبیدالرحمان ، حکیم احمد حسین اتحادی گولڈ میڈلسٹ ، حافظ عبداللہ بن مسعود اور دیگر بھی شامل تھے۔ وفد نے ڈاکٹر کامران کے علاوہ یونیورسٹی کے دیگر سٹاف شہزاد احمد ڈائریکٹر پبلک ریلیشنز، رجسٹرار یونیورسٹی شجیع الرحمان اور خزانہ دار عبدالستارظہوری، عرفان غازی ایڈیشنل کنٹرولر امتحانات غلام محمد سے بھی ملاقات کی ۔
Shares:
