سیالکوٹ (باغی ٹی وی، سٹی رپورٹر مدثر رتو) محرم الحرام کے دوران ممکنہ ہنگامی صورتحال سے بروقت نمٹنے کے لیے ڈپٹی کمشنر صبا اصغر کی زیرِ سرپرستی امام بارگاہ مستری عبداللہ اور در بتول میں ریسکیو اور سیکیورٹی اداروں کی مشترکہ فرضی مشق کا انعقاد کیا گیا۔ یہ مشق سیکریٹری ایمرجنسی سروسز ڈاکٹر رضوان نصیر کی خصوصی ہدایت پر کی گئی۔
ڈسٹرکٹ ایمرجنسی آفیسر انجینئر نوید اقبال کی نگرانی میں منعقدہ اس مشق میں ریسکیو 1122، سول ڈیفنس، پولیس، سی ٹی ڈی اور بم ڈسپوزل اسکواڈ کے اہلکاروں نے شرکت کی۔
مشق کے دوران فرضی بم دھماکہ کیا گیا، جس کے نتیجے میں "زخمی” افراد کو ریسکیو ٹیموں نے فوری طور پر طبی امداد فراہم کی اور قریبی اسپتال منتقل کیا۔ اسی دوران آگ بجھانے کی مشق بھی کی گئی، جس میں بروقت کارروائی کا عملی مظاہرہ پیش کیا گیا۔
اس مشق کا مقصد مختلف اداروں کے درمیان آپسی ہم آہنگی کو بہتر بنانا، تیاری کے معیار کو جانچنا، اور کسی بھی ممکنہ سانحے سے مؤثر طریقے سے نمٹنے کی صلاحیت کو مضبوط بنانا ہے۔
