سیالکوٹ/ڈسکہ (نمائندگان باغی ٹی وی)صوبائی وزیر بلدیات میاں ذیشان رفیق نے ڈسکہ سٹی میں جاری ترقیاتی منصوبوں کا موقع پر جا کر جائزہ لیا اور متعلقہ محکموں کو ہدایت جاری کی کہ سڑکوں کی تعمیر میں رفتار اور معیار کو ہر صورت یقینی بنایا جائے۔ انہوں نے واضح کیا کہ کسی قسم کی کوتاہی یا تاخیر برداشت نہیں کی جائے گی۔
زیر تعمیر سڑکوں میں پسرور روڈ، وزیرآباد روڈ، کالج روڈ اور بنک روڈ شامل ہیں، جب کہ جامکے روڈ پر ٹرنک سیور لائن بچھانے کا عمل جاری ہے، جس کے مکمل ہوتے ہی سڑک کی بحالی کا کام فوراً شروع کر دیا جائے گا۔ میاں ذیشان رفیق نے ہدایت کی کہ تمام منصوبے مقررہ وقت میں مکمل کیے جائیں تاکہ شہریوں کو دیرپا سہولیات فراہم کی جا سکیں۔
انہوں نے زور دیا کہ تعمیراتی مقامات پر ٹریفک کی روانی برقرار رکھنے کے لیے متبادل راستے واضح کیے جائیں اور مناسب سائن بورڈز نصب ہوں تاکہ عوام کو کسی قسم کی پریشانی کا سامنا نہ کرنا پڑے۔
اس موقع پر صوبائی وزیر نے پنجاب سٹیز پروگرام کے تحت جاری سیوریج منصوبے کی جلد تکمیل اور نالوں کی صفائی کے عمل پر بھی اطمینان کا اظہار کیا۔ انہوں نے مون سون کے پیش نظر میونسپل حکام کو ہدایت کی کہ تمام ڈسپوزل اسٹیشن فعال رکھے جائیں، بیک اپ جنریٹرز کی دستیابی یقینی بنائی جائے، اور ڈی واٹرنگ سیٹس و عملے کی ڈیوٹی کا تحریری شیڈول فوری جاری کیا جائے۔
میاں ذیشان رفیق نے دوٹوک الفاظ میں کہا کہ حکومت پنجاب کی ہدایات کے مطابق مفاد عامہ کے تمام منصوبے بروقت اور معیاری انداز میں مکمل کیے جائیں گے اور کسی بھی غفلت یا تاخیر پر سخت ایکشن لیا جائے گا۔
