ڈیرہ غازی خان (باغی ٹی وی، نیوز رپورٹر شاہد خان)کمشنر ڈیرہ غازی خان اشفاق احمد چوہدری نے ڈپٹی کمشنر محمد عثمان خالد کے ہمراہ بارش کے بعد شہر کے مختلف علاقوں کا دورہ کیا اور نکاسی آب کے عمل کا جائزہ لیا۔ اس موقع پر ریسکیو، ضلع کونسل، میونسپل کارپوریشن اور دیگر متعلقہ محکموں کے افسران بھی ان کے ہمراہ موجود تھے۔
کمشنر اشفاق چوہدری نے کہا کہ شہریوں کو ریلیف فراہم کرنے کے لیے تمام وسائل بروئے کار لائے جا رہے ہیں اور بارش کے پانی کی نکاسی مکمل استعداد کے ساتھ جاری ہے۔ انہوں نے عملے کی موجودگی اور فیلڈ میں کارکردگی کو سراہتے ہوئے ہدایت کی کہ نکاسی آب میں کسی قسم کی کوتاہی نہ برتی جائے۔
ڈپٹی کمشنر محمد عثمان خالد نے بریفنگ دیتے ہوئے بتایا کہ تمام ڈسپوزل ورکس اور ڈی واٹرنگ سیٹ مکمل فعال ہیں، اور شہر بھر سے جلد پانی نکال دیا جائے گا تاکہ عوام کو مشکلات کا سامنا نہ کرنا پڑے۔
