سابق ٹیسٹ کرکٹر سرفراز نواز نے اپنی وائرل تصویر کے حوالے سے اپنی صحت کے بارے میں وضاحت پیش کردی ہے۔ حال ہی میں سوشل میڈیا پر سرفراز نواز کی ایک تصویر خوب گردش کر رہی تھی جس میں انہیں طبی معائنہ کے دوران دیکھا جا رہا تھا۔ اس تصویر کی وجہ سے کئی افراد میں تشویش پائی جا رہی تھی کہ کہیں ان کی صحت خراب تو نہیں۔
سرفراز نواز نے اس حوالے سے جاری کردہ بیان میں کہا کہ وائرل ہونے والی تصویر درحقیقت ان کے دل کے سالانہ چیک اپ کے دوران کی ہے۔ انہوں نے مداحوں اور فالوورز کو یقین دہانی کرائی کہ ان کی صحت بالکل ٹھیک ہے اور اس تصویر کا مطلب یہ نہیں کہ ان کی طبیعت خراب ہے،سالانہ چیک اپ ان کی صحت کے معمول کا حصہ ہے اور اس میں کوئی غیر معمولی بات نہیں۔ سابق فاسٹ بولر نے کہا کہ ایسے چیک اپز ہر سال ہوتے رہتے ہیں تاکہ صحت کی مکمل جانچ پڑتال کی جا سکے، اس لیے پریشان ہونے کی کوئی ضرورت نہیں۔
