میرپورماتھیلو (نامہ نگار باغی ٹی وی، مشتاق علی لغاری) گھوٹکی کے کچے علاقے میں ڈاکوؤں اور اغواء کاروں کے خلاف پولیس کا بھرپور آپریشن جاری ہے۔ ایس ایس پی گھوٹکی محمد انور کھیتران کی قیادت میں تھانہ کچو بنڈی 1 کے کچے علاقے میں ضمیر جاگیرانی اور شوکت جاگیرانی گینگ کے خلاف کارروائی میں دو ڈی ایس پیز، پانچ ایس ایچ اوز اور بھاری نفری بکتر بند گاڑیوں کے ساتھ شریک ہے۔
پولیس اور ڈاکوؤں کے درمیان شدید فائرنگ کا تبادلہ جاری ہے، جبکہ پولیس نے اغواء کاروں کی کمین گاہوں اور ٹھکانوں تک رسائی حاصل کر کے انہیں نذر آتش کر کے مسمار کر دیا ہے۔ ایس ایس پی گھوٹکی کا کہنا ہے کہ یہ آپریشن تمام ڈاکوؤں کے ہتھیار ڈالنے تک جاری رہے گا۔
علاقے میں کشیدگی برقرار ہے اور پولیس کی مزید کمک بھی روانہ کی جا رہی ہے تاکہ امن و امان کو یقینی بنایا جا سکے۔
