شادی کے نام پر کم از کم آٹھ شادی شدہ مردوں کو اپنی محبت کے جال میں پھنسانے والی انتہائی چالاک اور مفرور خاتون سمیرا فاطمہ بالآخر گٹی کھدان پولیس کے ہاتھوں گرفتار کر لی گئی ہے۔
پولیس کے مطابق سمیرا، جو کہ ایک اعلیٰ تعلیم یافتہ اسکول ٹیچر بھی تھی، نے گزشتہ ڈیڑھ سال سے مختلف علاقوں میں رہنے والے مردوں کو جھانسہ دے کر ان سے لاکھوں روپے بٹورے۔ سمیرا نے سوشل میڈیا کے ذریعے خود کو طلاق یافتہ ظاہر کر کے مردوں کی ہمدردی حاصل کی اور کہا کہ وہ "دوسری بیوی بن کر رہنا چاہتی ہے”۔ اس بہانے سے وہ مردوں کو اپنی محبت میں گرفتار کرتی، پھر شادی کرتی اور جلد ہی جھگڑے شروع کر کے بلیک میلنگ شروع کر دیتی۔پولیس ذرائع کے مطابق سمیرا نے عدالتوں میں جھوٹے کیسز دائر کر کے، تصفیہ کے نام پر قیمتی رقم حاصل کی۔ غلام پٹھان نامی ایک مرد نے مارچ 2023 میں اس کے خلاف شکایت درج کروائی جس میں بتایا گیا کہ سمیرا نے 2010 سے اب تک آٹھ شادیاں کیں اور تقریباً 50 لاکھ روپے کا فراڈ کیا ہے۔
گٹی کھدان پولیس کے پاس تقریباً 10 لاکھ روپے کے فراڈ کے ٹھوس شواہد موجود ہیں۔ متاثرین کا کہنا ہے کہ سمیرا جھوٹے الزامات لگا کر انہیں ڈراتی دھمکاتی تھی اور تصفیہ کرانے کے لیے بھاری رقم وصول کرتی تھی۔پولیس نے بتایا کہ سمیرا کی تلاش کے لیے متعدد کارروائیاں کی گئیں لیکن وہ مفرور رہی۔ تاہم، جمعے کے روز سول لائنز کے علاقے میں ایک چائے کے اسٹال پر چائے پیتے ہوئے اسے گرفتار کر لیا گیا۔گٹی کھدان پولیس اب اس کے پرانے مقدمات کی تحقیقات کر رہی ہے اور متعدد متاثرین سامنے آ چکے ہیں جنہوں نے اپنی شکایات درج کروائی ہیں۔ پولیس کو خدشہ ہے کہ سمیرا نے مزید کئی افراد کو اپنا شکار بنایا ہے جن کی جلد شناخت کر کے مقدمات درج کیے جائیں گے۔
