سیالکوٹ (بیوروچیف خرم میر): تھانہ نیکاپورہ کے علاقہ میں ایک انوکھی اور افسوسناک واردات پیش آئی جہاں ایک ڈاکو اپنے ہی ساتھی کی فائرنگ کی زد میں آکر ہلاک ہو گیا۔
ابتدائی معلومات کے مطابق یہ واقعہ نیکاپورہ کے ایمن آباد روڈ پر ٹیولپ مارکی کے قریب پیش آیا۔ دو مسلح ڈاکوؤں نے ایک پھل فروش ندیم کو لوٹنے کی کوشش کی۔ جب ندیم نے مزاحمت کی تو ڈاکوؤں میں سے ایک نے فائرنگ کر دی، لیکن بدقسمتی سے گولی اس کے اپنے ہی ساتھی کو جا لگی جس کی وجہ سے وہ موقع پر ہی ہلاک ہو گیا۔ فائرنگ کرنے والا ڈاکو اس واردات کے بعد جائے وقوعہ سے فرار ہونے میں کامیاب ہو گیا۔
واقعے کی اطلاع ملتے ہی تھانہ نیکاپورہ کے ایس ایچ او پولیس کی بھاری نفری کے ہمراہ فوری طور پر موقع پر پہنچ گئے۔ انہوں نے قانونی کارروائی کا آغاز کر دیا ہے۔ ہلاک ہونے والے ڈاکو کی شناخت مدثر صابر ولد صابر، سکنہ بن حاجی پورہ کے طور پر ہوئی ہے۔ پولیس ریکارڈ کے مطابق، مدثر متعدد مقدمات میں ملوث تھا۔
فرار ہونے والے ملزم کی تلاش کے لیے پولیس نے علاقے میں سرچ آپریشن شروع کر دیا ہے۔ اس واقعے نے علاقے میں خوف و ہراس کی فضا پیدا کر دی ہے، جبکہ پولیس کا کہنا ہے کہ جلد ہی فرار ملزم کو گرفتار کر لیا جائے گا۔
