اسلام آباد: حکومت کی جانب سے جاری کردہ زراعت شماری رپورٹ 2024 کے مطابق پاکستان میں گدھوں کی مجموعی تعداد 49 لاکھ ہو چکی ہے، جس میں پنجاب صوبہ سب سے آگے ہے جہاں گدھوں کی تعداد دیگر تمام صوبوں سے نمایاں طور پر زیادہ ہے۔
رپورٹ کے مطابق پنجاب میں گدھوں کی تعداد 24لاکھ3ہزار، سندھ میں گدھوں کی تعداد 10 لاکھ 81 ہزار، خیبرپختونخواہ میں 7 لاکھ82 ہزار اور بلوچستان میں گدھوں کی تعداد 6 لاکھ30 ہزار ہوچکی ہے۔ وفاقی دارالحکومت اسلام آباد میں گدھوں کی تعداد 4 ہزار ریکارڈ کی گئی،بلوچستان کےمقابلے پنجاب میں گدھوں کی تعداد 17 لاکھ73ہزار زیادہ بنتی ہے، پنجاب میں خیبر پختونخواہ کےمقابلے گدھوں کی تعداد 16 لاکھ 21 ہزار اور سندھ کے مقابلے پنجاب میں گدھوں کی تعداد 13لاکھ 22 ہزار زیادہ بنتی ہے۔
یہ اعداد و شمار نہ صرف پاکستان کے گدھوں کی مجموعی آبادی کی جھلک پیش کرتے ہیں بلکہ یہ بھی ظاہر کرتے ہیں کہ پنجاب میں گدھے کی افزائش اور پالنے کا رجحان دیگر صوبوں کے مقابلے میں بہت زیادہ ہے۔یہ رپورٹ زراعت کے شعبے کی ترقی اور ملک میں مویشیوں کی تعداد کی درست معلومات فراہم کرنے میں مددگار ثابت ہو گی، جس سے مستقبل میں بہتر منصوبہ بندی کی جاسکے گی۔
