قصور (باغی ٹی وی ،ڈسٹرکٹ رپورٹرطارق نویدسندھو) ڈسٹرکٹ پولیس آفیسر (ڈی پی او) محمد عیسیٰ خاں کی ہدایت پر پولیس نے پتنگ بازوں اور پتنگ فروشی میں ملوث افراد کے خلاف بڑے پیمانے پر کریک ڈاؤن شروع کر دیا ہے۔ اس مہم کے دوران 20 ملزمان کو گرفتار کیا گیا ہے اور ان کے قبضے سے 238 پتنگیں اور 32 ڈور کی چرخیاں برآمد ہوئی ہیں۔
یہ کارروائیاں تھانہ اے ڈویژن، بی ڈویژن، صدر قصور اور مصطفیٰ آباد پولیس نے کیں۔ گرفتار ملزمان کے خلاف کائیٹ فلائنگ ایکٹ کی خلاف ورزی کے تحت الگ الگ مقدمات درج کیے گئے ہیں۔
ڈی پی او محمد عیسیٰ خاں نے اس موقع پر کہا کہ پتنگ بازی ایک خونی کھیل اور جرم ہے، اور جو بھی اسے اڑائے گا اسے جیل جانا پڑے گا۔ انہوں نے والدین سے بھی اپیل کی کہ وہ اپنے بچوں کو اس خطرناک کھیل سے دور رکھیں تاکہ ان کا مستقبل محفوظ رہے۔
