وفاقی وزیر داخلہ محسن نقوی نے کالعدم بی ایل اے اور کالعدم مجید بریگیڈ کو دہشت گرد تنظیمیں قرار دینے کے امریکی فیصلے کا خیرمقدم کیا ہے۔
اپنے بیان میں محسن نقوی نے کہا کہ امریکی صدر ڈونلڈ ٹرمپ اور ان کی انتظامیہ کا تہ دل سے شکریہ ادا کرتے ہیں یہ پاکستان کی سفارتی محاذ پر اہم کامیابی اور ہمارے ازلی دشمن کے لیے ایک اور شکست ہے امریکی اقدام دہشتگردی کے خلاف جنگ میں پاکستان کی لازوال قربانیوں کا اعتراف ہے۔
انہوں نے کہا کہ دہشت گردی کے خلاف پاک امریکا تعاون خوش آئند ہے کالعدم بی ایل اے اور کالعدم مجید بریگیڈ کے خلاف عالمی سطح پر کارروائی کی راہ ہموار ہو ئی ہے، دہشت گردوں کے خلاف مشترکہ موقف وقت کی ضرورت ہے،امریکی اقدام سے خطے میں امن و استحکام کو فروغ ملے گا۔
پاکستان فلور ملز ایسوسی ایشن کو ساڑھے 3 کروڑ جرمانہ
قبل،ازیں،ترجمان دفتر خارجہ نے امریکی حکومت کے فیصلے پر اپنے ردعمل میں کہا ہے کہ کالعدم بلوچ لبریشن آرمی ( بی ایل اے) اور مجید بریگیڈ کو بین الاقوامی دہشت گرد تنظیموں کی فہرست میں شامل کرنا خوش آئند ہے، پاکستان نے 18 جولائی 2024 کو مجید بریگیڈ کو کالعدم قرار دیا تھا، بی ایل اے/مجید بریگیڈ متعدد دہشت گرد حملوں میں ملوث رہی ہے، جعفر ایکسپریس اور خضدار بس حملے بی ایل اے/مجید بریگیڈ کی کارروائیاں تھیں،پاکستان دہشت گردی کے خلاف مضبوط حصار ہے اور دہشت گردی کے خاتمے کے لیے پر عزم ہے، پاکستان دہشت گردی کے خلاف عالمی برادری سے تعاون جاری رکھے گا۔
واضح رہے کہ امریکی محکمہ خارجہ نے گزشتہ روز کالعدم بی ایل اے اور مجید بریگیڈ کو عالمی دہشت گردوں کی فہرست میں شامل کرنے کا اعلان کیا تھا،امریکی محکمہ خارجہ کی جانب سے جاری پریس ریلیز میں کہا گیا تھا کہ بی ایل اے اور مجید بریگیڈ کو دہشتگردوں کی فہرست میں شامل کردیا گیا ہے۔
گلوکار عاطف اسلم کے والد انتقال کر گئے
اعلامیہ میں کہا گیا تھا کہ 2019 میں کالعدم بی ایل اے کو خصوصی طور پر نامزد عالمی دہشت گرد قرار دیا گیا تھا جبکہ مجید بریگیڈ کا نام بی ایل اے کے عالمی دہشت گرد فہرست میں شامل ہے،ٹرمپ انتظامیہ کا دہشتگردی کی روک تھام کے لیے عزم برقرار ہے، بی ایل اے نے 2024 میں کراچی ایئرپورٹ اور گوادر میں خودکش حملوں کی ذمہ داری قبول کی تھی، جبکہ 2025 میں بی ایل اے نے جعفر ایکسپریس ہائی جیکنگ کی ذمہ داری قبول کی تھی. جعفر ایکسپریس ہائی جیکنگ میں 31 افراد جاں بحق ہوئے تھے اور 300 سے زائد افراد کو یرغمال بنایا گیا تھا۔
