نائب وزیراعظم و وزیر خارجہ اسحاق ڈار نے لندن میں برطانیہ کے وزارتِ خارجہ، دولتِ مشترکہ و ترقیاتی امور (ایف سی ڈی او ) میں برطانیہ کے پارلیمانی انڈر سیکریٹری آف اسٹیٹ برائے مشرق وسطیٰ، افغانستان اور پاکستان، ہیمرش فالکنر سے ملاقات کی۔
دفتر خارجہ کے مطابق ملاقات کے دوران دونوں فریقین نے دوطرفہ تعلقات کے تمام پہلوؤں کا جائزہ لیا اور سیاسی، معاشی، ماحولیاتی اور عوامی سطح پر روابط سمیت مختلف شعبوں میں تعاون کو مزید گہرا کرنے کے عزم کا اعادہ کیادونوں رہنماؤں کی ملاقات کے دوران خطے کی صورتحال اور عالمی امور پر بھی تبادلۂ خیال کیا گیا۔
وزیر خارجہ نے پاکستان کے اقتصادی اصلاحات کے عزم کو اجاگر کیا اور خطے کی صورت حال پر پاکستان کا مؤقف پیش کیا، جس میں جنوبی ایشیا میں امن و استحکام شامل ہے،انہوں نے جموں و کشمیر کے تنازعے کے منصفانہ اور پرامن حل کی ضرورت پر زور دیا، جو متعلقہ اقوام متحدہ سلامتی کونسل کی قراردادوں کے مطابق ہو۔
دونوں رہنماؤں نے پاکستان اور برطانیہ کے تعلقات کی مثبت پیش رفت کو سراہا اور باہمی دلچسپی کے شعبوں میں جاری تعاون پر اطمینان کا اظہار کیا،انہوں نے اس بات پر بھی زور دیا کہ اعلیٰ سطحی روابط کا تسلسل جاری رکھا جائے تاکہ موجودہ رفتار کو آگے بڑھایا جا سکے اور اسٹریٹجک تعاون کے نئے مواقع تلاش کیے جا سکیں۔
