ڈیرہ غازی خان (سٹی رپورٹر): ڈیرہ غازی خان کے گورنمنٹ بوائز کالج بلاک 17 میں محکمہ ہائر ایجوکیشن پنجاب کے زیرِ اہتمام صوبائی سطح پر ‘معرکۂ حق’ کے عنوان سے کھیلوں کے مقابلے منعقد کیے گئے۔ اس موقع پر بیڈمنٹن اور دیگر کھیلوں کے مقابلے ہوئے جن میں مختلف کالجز کے طلبہ نے شرکت کی۔
تقریب کے مہمانِ خصوصی، رکن صوبائی اسمبلی محمد حنیف پتافی نے اپنے خطاب میں کہا کہ وزیر اعلیٰ پنجاب مریم نواز شریف کھیلوں کے فروغ کے لیے انقلابی اقدامات کر رہی ہیں۔ انہوں نے مزید کہا کہ تعلیمی اداروں میں کھیلوں کے مقابلے منعقد کرنے کا مقصد نوجوانوں کو مثبت سرگرمیوں کی طرف راغب کرنا اور نچلی سطح پر ٹیلنٹ کی تلاش اور تربیت کرنا ہے۔ انہوں نے نوجوانوں کو ملک کا قیمتی اثاثہ قرار دیتے ہوئے کہا کہ کھیلوں میں حصہ لے کر وہ نہ صرف جسمانی اور ذہنی طور پر مضبوط بنتے ہیں بلکہ بین الاقوامی سطح پر پاکستان کا نام بھی روشن کرتے ہیں۔
اس سپورٹس ایونٹ میں بیڈمنٹن اور ٹیبل ٹینس سمیت دیگر مقابلے بھی شامل تھے جس میں طلبہ نے بھرپور حصہ لیا۔ تقریب میں ڈائریکٹر کالجز، غازی یونیورسٹی کے اساتذہ، دیگر اداروں کے پروفیسرز، طلبہ اور شہریوں کی بڑی تعداد نے شرکت کی۔
تقریب کے اختتام پر شہداء کو خراجِ عقیدت پیش کیا گیا اور پاکستان آرمی کی کامیابیوں کو سراہتے ہوئے کہا گیا کہ ‘معرکۂ حق’ میں افواجِ پاکستان نے دشمن کا غرور خاک میں ملا کر ملک کا پرچم بلند رکھا ہے۔
