اوکاڑہ (نامہ نگار): ڈپٹی کمشنر احمد عثمان جاوید کی زیر صدارت ڈسٹرکٹ ڈویلپمنٹ کمیٹی کا اجلاس منعقد ہوا، جس میں ڈسٹرکٹ کمپلیکس، ڈی سی آفس، تحصیل کمپلیکس اور ڈسٹرکٹ اٹارنی آفس میں جاری ترقیاتی منصوبوں اور تعمیراتی کاموں کا جائزہ لیا گیا۔
اجلاس میں ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ڈپٹی ڈائریکٹر ڈویلپمنٹ مرغوب حسین ڈوگر، اسسٹنٹ ڈسٹرکٹ اٹارنی عمران رشید سمیت دیگر افسران موجود تھے۔
ڈپٹی کمشنر نے ہدایت کی کہ ترقیاتی منصوبوں کی تعمیر اور مرمت کے کاموں کو مستحکم بنیادوں پر انجام دیا جائے اور اس سلسلے میں ایک جامع حکمت عملی مرتب کی جائے۔ انہوں نے کہا کہ ترقیاتی امور کو عملی طور پر پایہ تکمیل تک پہنچانے کے لیے موثر اقدامات کیے جائیں۔
