پاکستان تحریک انصاف (پی ٹی آئی) کے چیئرمین بیرسٹر گوہر خان نے کہا ہے کہ لوگ فلمیں نہ چلائیں پارٹی عہدے سے استعفیٰ دینا سنجیدہ ایشو ہے۔ سلمان اکرم راجہ کے استعفے کے بارے میں سنا ہے لیکن ان کا بیان نہیں پڑھا،سلمان اکرم راجہ کے استعفے پر بانی پی ٹی آئی فیصلہ کریں گے،کوئی لیڈر پبلک میں کمنٹس نہ کرے۔
راولپنڈی میں اڈیالہ جیل کے باہر میڈیا سے گفتگو کرتے ہوئے انہوں نے کہا کہ سلمان اکرم راجہ سمیت کسی لیڈر کو پارٹی معاملات پر ٹوئٹ نہیں کرنا چاہیے، سلمان اکرم راجہ کے استعفے پر بانی پی ٹی آئی فیصلہ کریں گے۔بدقسمتی سے پارٹی کے اندر سے کوئی نہ کوئی چیز باہر آتی ہے جس سے تنازع کھڑا ہوتا ہے، پارٹی کے اندر سے باتیں باہر آتی ہیں تو لوگ سمجھتے ہیں اختلافات ہیں۔بانی کی بھی واضح ہدایات ہیں کوئی پارٹی لیڈر پبلک میں اپنا استعفیٰ پیش نہیں کرے گا، بانی کی واضح ہدایات ہیں کوئی لیڈر پبلک میں کمنٹس نہ کرے، بیرسٹر گوہر نے کہا کہ آج بانی سے ملنے آیا تھا پولیس نے روک دیا ہے، ملاقاتوں سے روکنا مناسب بات نہیں، میں ہمیشہ کہتا ہوں مفاہمت ہونی چاہیے، ناجائز سزاؤں، نااہلیوں اور گرفتاریوں سے دوریاں بڑھیں گی۔سیاسی کمیٹی نے انتخابات میں حصہ لینے یا نہ لینے کا فیصلہ اگر کیا ہے، میں اس میٹنگ میں نہیں تھا۔ بانی کی ہدایات اگر انتخابات میں حصہ نہ لینے کی ہیں تو بانی کی بات ہی حتمی بات ہو گی، کچھ باتوں پر ابہام ہے لیکن بانی کی ہدایات پر سو فیصد عمل ہو گا۔ ضمنی انتخابات میں جانے کے حوالے سے بانی پی ٹی آئی فیصلہ کریں گے، ضمنی انتخابات پر کچھ شکوک و شبہات ہیں، بانی سے ملاقات کے بعد فیصلہ کریں گے، پارٹی میں انتخابات میں حصہ لینے کی رائے ضرور موجود ہے لیکن فیصلہ بانی نے کرنا ہے۔ اپوزیشن لیڈر کس کو ہونا چاہیے کس کو نہیں اس کا فیصلہ بانی پی ٹی آئی نے کرنا ہے، جب اپوزیشن لیڈر کی نشست خالی ہوئی میں نے کہیں پر اپنے آپ کو امیدوار پیش نہیں کیا، ہم نے اپوزیشن لیڈر کی نشست پر اسٹے لیا ہے، پارلیمنٹ اپوزیشن لیڈر کے بغیر بھی چل سکتی ہے،ہمارے کسی سطح پر کوئی مذاکرات نہیں ہو رہے، ہمارے لیے صورتحال ٹف ہے لیکن اپوزیشن کے بغیر جمہوریت نہیں چل سکتی، علیمہ خان کا پارٹی امور سے کوئی تعلق نہیں، وہ پارٹی امور پر اثر انداز نہیں ہو رہیں یہ غلط تاثر ہے، پارٹی کے سو فیصد فیصلے بانی خود کرتے ہیں۔
دوسری جانب بانی پی ٹی آئی عمران خان نے پی ٹی آئی کے سیکرٹری جنرل سلمان اکرم راجہ کا استعفیٰ مسترد کردیا۔اڈیالہ جیل کے باہر میڈیا سے بات چیت کرتے ہوئے سلمان اکرم راجہ نے کہا کہ عمران خان نے ان کا استعفیٰ منظور نہیں کیا۔سلمان اکرم راجہ نے کہا کہ عمران خان کی ہدایات پر ضمنی انتخابات کے حوالے سے سیاسی کمیٹی کی آج شام کو دوبارہ میٹنگ ہوگی۔سلمان اکرم راجہ نے مزید کہا کہ اپوزیشن لیڈر عمر ایوب اور شبلی فرازہی ہیں، وہ عدالتوں میں اپنے مقدمات لڑ رہے ہیں۔
