ٹھٹھہ (ڈسٹرکٹ رپورٹر بلاول سموں) ٹھٹھہ پولیس نے ایک بڑی کامیابی حاصل کرتے ہوئے ولیج اگاریو پٹیل خاصخیلی میں پیش آنے والے ‘اندھے قتل’ کیس کو حل کر لیا ہے۔ پولیس نے اس واردات میں ملوث دو ملزمان کو گرفتار کر لیا ہے۔
تفصیلات کے مطابق 13 ستمبر 2025 کو کھیتوں میں علی نواز ملاح نامی شخص کی تشدد زدہ لاش ملی تھی، جس پر تھانہ ساکرو میں مقدمہ درج کیا گیا تھا۔ ایس ایس پی ٹھٹھہ فاروق احمد بجارانی نے کیس کی اہمیت کے پیش نظر ایک خصوصی ٹیم تشکیل دی تھی۔
اس ٹیم نے ایس ڈی پی او ساکرو قادر بخش خاصخیلی کی زیر نگرانی خفیہ معلومات کی بنیاد پر کارروائی کرتے ہوئے ملزمان سلیم ملاح اور غلام مصطفیٰ ملاح کو گرفتار کر لیا۔ ابتدائی تفتیش کے دوران دونوں ملزمان نے اپنے جرم کا اعتراف بھی کر لیا ہے۔
ایس ایس پی ٹھٹھہ نے اس اہم کیس کو حل کرنے پر پولیس ٹیم کی کارکردگی کو سراہا اور انہیں تعریفی اسناد دینے کا اعلان کیا ہے۔
