آزاد کشمیر کے دارالحکومت مظفر آباد میں حکومت اور جوائنٹ ایکشن کمیٹی کے درمیان مذاکرات کا دوسرا دور ہو رہا ہے۔
پاکستان مسلم لیگ (ن) کے رکن قومی اسمبلی طارق فضل چوہدری نے سماجی رابطے کی ویب سائٹ ایکس پر بتایا کہ وزیراعظم شہباز شریف کی ہدایت پر مظفر آباد بھیجی گئی حکومتی ٹیم اور عوامی ایکشن کمیٹی آزاد جموں و کشمیر کے نمائندوں کے درمیان بات چیت جاری ہے۔طارق فضل چوہدری نے کہا کہ کشمیری عوام کے حقوق کے ہم مکمل حامی ہیں، ان کے زیادہ تر عوامی مفاد پر مبنی مطالبات پہلے ہی منظور کیے جا چکے ہیں جبکہ چند مطالبات جن کے لیے آئینی ترامیم درکار ہیں ان پر بات چیت جاری ہے۔
انہوں نے مزید کہا کہ تشدد کسی مسئلے کا حل نہیں، توقع ہے کہ ایکشن کمیٹی تمام مسائل کو پُرامن مذاکرات کے ذریعے حل کرے گی۔مذاکرات میں شریک حکومتی ٹیم میں وفاقی وزرا رانا ثنااللہ، احسن اقبال، سردار یوسف، امیر مقام، ڈاکٹر طارق فضل چوہدری، پیپلز پارٹی کے رہنما قمر زمان کائرہ، سابق وزیراعظم راجا پرویز اشرف اور سابق صدر آزاد کشمیر سردار مسعود خان شامل ہیں۔
عوامی ایکشن کمیٹی کی نمائندگی شوکت نواز میر، راجہ امجد ایڈووکیٹ اور انجم زمان کر رہے ہیں، جبکہ آزاد کشمیر کی حکومتی کمیٹی بھی اجلاس میں موجود ہے۔
پنجاب حکومت کا دفاتر میں فائل سسٹم ختم، ڈیجیٹل نظام نافذ
پی آئی اے کی برطانیہ کے لیے پروازوں کی بحالی کا اعلان
