اوکاڑہ (باغی ٹی وی، نامہ نگار ملک ظفر) ڈپٹی کمشنر احمد عثمان جاوید کی ہدایت پر محکمہ سول ڈیفنس کی جانب سے غیر قانونی ایل پی جی شاپس اور منی پٹرول ایجنسیوں کے خلاف بھرپور کارروائیاں کی گئیں۔ سول ڈیفنس آفیسر جاوید اختر کی نگرانی میں ٹیموں نے ایل پی جی ریفلنگ کا غیر قانونی کاروبار کرنے والے مالکان کے خلاف کارروائی کرتے ہوئے 4 ایل پی جی ریفلنگ شاپس کو سربمہر کردیا جبکہ ایک دکاندار کا ریفلنگ سامان قبضے میں لے لیا گیا۔
مزید برآں غیر قانونی طور پر پٹرول فروخت کرنے والے 9 منی پٹرول ڈبہ اسٹیشنز کو ختم کر دیا گیا جبکہ ایک کے خلاف مقدمہ متعلقہ تھانے میں درج کروا دیا گیا۔ سول ڈیفنس کے انسٹرکشنل اسٹاف نے انڈسٹریل اور کمرشل یونٹس میں فائر سیفٹی کے نامکمل انتظامات پر 4 مالکان کے خلاف چالان تیار کر کے سول جج/مجسٹریٹ سیکشن 30 ڈسٹرکٹ کورٹس میں جمع کروائے اور 4 دیگر مالکان کو نوٹسز جاری کیے۔
اسی سلسلے میں گورنمنٹ نیو کیمپس اسکول میں پنجاب سول ڈیفنس ریزیلینس کور کا کیمپ بھی لگایا گیا جس میں 310 طلبا کو آن لائن رجسٹرڈ کیا گیا۔ سول ڈیفنس حکام کے مطابق یہ اقدامات عوامی سلامتی اور حادثات کی روک تھام کے لیے اٹھائے جا رہے ہیں۔
