منڈی بہاؤالدین (باغی ٹی وی، نامہ نگار افنان طالب عرف چاندی) وزیراعلیٰ پنجاب مریم نواز شریف کے ویژن اور ڈائریکٹر جنرل پنجاب فوڈ اتھارٹی عاصم جاوید کی ہدایت پر ڈپٹی ڈائریکٹر آپریشنز عدیل احمد کی زیر نگرانی فوڈ سیفٹی ٹیم نے تحصیل ملکوال کے نواحی علاقے موج دین کالونی میں بیمار اور مردار جانوروں کا گوشت فروخت کرنے والے گروہ کے خلاف مؤثر کارروائی کی۔
کارروائی کے دوران 500 کلوگرام خراب اور ناقص گوشت برآمد کیا گیا، جسے ڈپٹی ڈائریکٹر لائیو اسٹاک کی جانچ پڑتال کے بعد موقع پر ہی تلف کر دیا گیا۔ پولیس نے مجرمان کے خلاف ایف آئی آر درج کر لی جبکہ موقع سے دو گاڑیاں، ایک موٹر سائیکل، فریزر اور ذبح کے تمام آلات ضبط کر لیے گئے۔
ڈپٹی ڈائریکٹر آپریشنز عدیل احمد نے کہا کہ غیر معیاری اور مضرِ صحت خوراک کی فروخت سنگین جرم ہے، جس کی روک تھام کے لیے پنجاب فوڈ اتھارٹی بھرپور ایکشن میں ہے۔ انہوں نے مزید کہا کہ صحت مند اور معیاری گوشت کی فراہمی یقینی بنانے کے لیے روزانہ کی بنیاد پر کارروائیاں جاری ہیں، تاکہ عوام کو محفوظ خوراک میسر آ سکے۔
