وزیراعظم محمد شہباز شریف نےسوات کے علاقے مٹہ میں انسداد پولیو ٹیم پر دہشتگرد حملے کی شدید مذمت کی ہے
وزیراعظم نے انسداد پولیو ٹیم کی حفاظت پر مامور لیویز اہلکار عبد الکبیر کی شہادت پر اظہار افسوس کیا،وزیراعظم نے شہید کے لیے دعائے مغفرت اور لواحقین کے لیے صبر و استقامت کی دعا کی، وزیراعظم شہباز شریف کا کہنا تھا کہ پولیو کے خاتمے کی اہم عوامی خدمت کرنے والوں پر دہشتگرد حملہ ناقابلِ برداشت ہے،حکومت ملک سے پولیو کے مکمل خاتمے کے لیے پر عزم ہے،دہشتگردوں کی جانب سے اس قسم کی مزاحمت کے باوجود انسداد پولیو مہم مکمل تحریک کے ساتھ جاری ہے اور پولیو کے مکمل خاتمے تک جاری رہے گی،
واضح رہے کہ سوات کے تحصیل مٹہ کے علاقے بیاکند روڈ، اینزرگے ڈاگ میں پولیو ٹیم کی سیکیورٹی پر مامور لیوی اہلکار عبدالکبیر کو دہشتگردوں کی فائرنگ سے شہید کر دیا گیا۔پولیس کے مطابق پولیو ٹیم کی خواتین اہلکار گھر کے اندر بچوں کو قطرے پلا رہی تھیں جبکہ لیوی اہلکار باہر سیکیورٹی پر موجود تھا۔ اسی دوران دہشتگردوں نے فائرنگ کی اور فرار ہو گئے
