پاکستان اسپیس اینڈ اپر ایٹموسفیئر ریسرچ کمیشن (سپارکو) نے پاکستان کے پہلے ہائپر اسپیکٹرل سیٹلائٹ (HS-1) کے کامیاب لانچ کا اعلان کیا ہے۔ یہ تاریخی کامیابی پاکستان کے خلائی پروگرام میں ایک اہم سنگِ میل کی حیثیت رکھتی ہے اور ملک کو جدید خلائی ٹیکنالوجی کے میدان میں ایک نئے دور میں داخل کر رہی ہے۔
یہ سیٹلائٹ انتہائی جدید ٹیکنالوجی سے آراستہ ہے جو سینکڑوں باریک طیفی بینڈز میں بے حد درست تصاویر حاصل کرنے کی صلاحیت رکھتا ہے۔ یہ نظام زمین، سبزے، پانی اور شہری علاقوں کے تجزیے کے لیے ایک نئی جہت متعارف کرائے گا۔ یہ جدید ٹیکنالوجی پاکستان کی استعداد کو درست زرعی منصوبہ بندی، ماحولیاتی نگرانی، شہری ترقی اور آفات سے پیشگی تحفظ میں انقلابی طور پر مضبوط بنائے گی۔
اس موقع پر چیئرمین سپارکو جناب محمد یوسف خان نے پوری قوم کو مبارکباد دی اور حکومتِ پاکستان کا شکریہ ادا کیا کہ جس کی حمایت سے یہ قومی منصوبہ حقیقت بن سکا۔ انہوں نے کہا کہ ہائپر اسپیکٹرل سیٹلائٹ سے حاصل ہونے والا ڈیٹا ملک میں زرعی پیداوار میں اضافہ، موسمیاتی استحکام اور قدرتی وسائل کے مؤثر استعمال میں ایک نئی راہ متعین کرے گا۔
اپنی اعلیٰ تصویری صلاحیتوں کے ذریعے (HS-1) ملک کو فصلوں کی صحت، مٹی کی نمی اور پانی کے معیار کی درست نقشہ سازی میں مدد دے گا، جبکہ جنگلات کی کٹائی، آلودگی اور گلیشیئر پگھلنے جیسے ماحولیاتی عوامل کی باقاعدہ نگرانی ممکن بنائے گا۔ یہ سیٹلائٹ سیلاب، لینڈ سلائیڈنگ اور دیگر قدرتی آفات کے لیے پیشگی وارننگ اور بعد از آفت جائزوں میں بھی مؤثر کردار ادا کرے گا، خاص طور پر شمالی علاقوں میں۔ مزید برآں، یہ منصوبہ سی پیک جیسے بڑے ترقیاتی اقدامات میں جغرافیائی خطرات کی نشاندہی اور پائیدار انفراسٹرکچر کی منصوبہ بندی میں معاون ثابت ہوگا۔
ہائپر اسپیکٹرل سیٹلائٹ (HS-1) کی کامیاب لانچ پاکستان اور چین کے درمیان طویل المدتی خلائی تعاون کا ایک اور روشن باب ہے۔ یہ مشن دونوں ممالک کے بڑھتے ہوئے تزویراتی تعلقات اور دیرینہ دوستی کی عکاسی کرتا ہے جو پُرامن خلائی تحقیق اور سماجی و معاشی ترقی کے لیے تعاون کو مزید مستحکم کر رہا ہے۔
پاکستان کے بڑھتے ہوئے خلائی پروگرام میں (HS-1) کی شمولیت، خلائی ٹیکنالوجی کے میدان میں خود انحصاری کی جانب ایک مضبوط قدم ہے اور یہ سپارکو کے اس کردار کو مزید مستحکم کرتا ہے جو ملک کی سماجی و اقتصادی ترقی کو جدید خلائی ایپلی کیشنز کے ذریعے آگے بڑھا رہا ہے۔
پروجیکٹ ڈائریکٹر (HS-1) جناب مشتاق حسین سومرو نے اس کامیابی کو مشن ٹیم کی انتھک محنت اور تکنیکی مہارت کا نتیجہ قرار دیا۔ انہوں نے کہا کہ ہائپر اسپیکٹرل سیٹلائٹ کا اجرا پاکستان کے خلائی پروگرام میں ایک بڑی پیش رفت ہے جو ملک کو پائیدار ترقی کے لیے خلائی ٹیکنالوجی کے ابھرتے ہوئے رہنماؤں میں شامل کر رہا ہے۔
