پبلک اکاؤنٹس کمیٹی (پی اے سی) کی ذیلی کمیٹی کے اجلاس میں پاکستان کرکٹ بورڈ (پی سی بی) سے رقم کی ریکوری سے متعلق آڈٹ اعتراضات کا جائزہ لیا گیا۔
اجلاس میں کہا گیا کہ پاکستان کرکٹ بورڈ (پی سی بی) سے گراؤنڈ رینٹ کی مد میں 1 کروڑ 77 لاکھ کی ریکوری نہیں کی گئی،آڈٹ حکام نے کہا کہ وزارت ہاؤسنگ نے پی سی بی سے یکم جنوری 2019 سے 30جون 2022 تک کرایہ وصول نہیں کیا۔ وزارت ہاوسنگ اینڈ ورکس نےکراچی میں 5 لاکھ 5 ہزار 700 مربع گز زمین 99 سالہ لیز پر دی، لیز ایگریمنٹ کے تحت پی سی بی کو یہ زمین 10 روپے مربع گز کے حساب سے الاٹ کی گئی تھی،اجلاس میں کمیٹی نے پی سی بی سے رقم ریکور کرنے کی ہدایت کر دی۔ کمیٹی نے سرکاری زمین پر قابض دیگر اداروں سے بھی رینٹ وصول کرنے کی ہدایت کی۔
فیڈرل لاجز کے کمرے اور سویٹ نیب افسران کو مستقل طور پر الاٹ کرنے کا انکشاف ہوا ہے، وزارت ہاؤسنگ نیب افسران سے سرکاری رہائش گاہیں خالی کرانے میں ناکام ہوگیا۔ آڈٹ حکام نے سرکاری سویٹ خالی کرانے کی سفارش کردی۔
پبلک اکاؤنٹس کمیٹی کی ذیلی کمیٹی کا محمد معین عامر پیرزادہ کی زیر صدارت اجلاس ہوا، جس میں فیڈرل لاجز کے کمرے اور سویٹ نیب افسران کو مستقل طور پر الاٹ کرنے کا انکشاف ہوا ہے، سرکاری ملازمین سے ایک کروڑ 56 لاکھ روپے کرایہ وصول نہ کرنے کا بھی انکشاف ہوا ہے۔وزارت ہاؤسنگ نیب افسران سے سرکاری رہائش گاہیں خالی کرانے میں ناکام ہوگیا۔ آڈٹ حکام نے سرکاری سویٹ خالی کرانے کی سفارش کردی جبکہ ذیلی کمیٹی کی فیڈرل لاجز کا خصوصی آڈٹ کرنے کی ہدایت کی ہے۔رپورٹ کے مطابق کمیٹی نے سرکاری رہائش گاہوں میں مقیم سرکاری ملازمین کی تنخواہ سے کرایے کی کٹوتی کی ہدایت کردی۔
