جسٹس جہانگیری ڈگری کیس میں آج ایک بڑی پیش رفت سامنے آئی ہے، جب اسلام آباد ہائیکورٹ کا سماعت کرنے والا دو رکنی بنچ ٹوٹ گیا۔
تفصیلات کے مطابق، جسٹس خادم حسین سومرو نے دورانِ سماعت کیس سننے سے معذرت کرلی، جس کے نتیجے میں بنچ تحلیل ہوگیا۔ اس کیس کی سماعت چیف جسٹس سرفراز ڈوگر اور جسٹس خادم حسین سومرو پر مشتمل دو رکنی بینچ کر رہا تھا۔ذرائع کے مطابق، اسلام آباد بار ایسوسی ایشن کی جانب سے کیس میں فریق بننے کی متفرق درخواست بھی سماعت کے لیے مقرر تھی۔ تاہم، دورانِ کارروائی جب جسٹس خادم حسین سومرو نے خود کو سماعت سے الگ کیا تو بنچ ٹوٹ گیا اور سماعت بغیر کسی مزید کارروائی کے ملتوی کر دی گئی۔
قانونی ماہرین کے مطابق، بنچ کے ٹوٹنے کے بعد اب نیا بینچ تشکیل دیا جائے گا جو کیس کی آئندہ سماعت کرے گا۔ اس پیش رفت کے بعد کیس کی کارروائی میں مزید تاخیر کا امکان ظاہر کیا جا رہا ہے۔
