وفاقی وزیر مواصلات عبدالعلیم خان کی زیرصدارت این ایچ اے کا اعلیٰ سطح اجلاس ہوا، وفاقی وزیر مواصلات نے این ایچ اے کو موجودہ پالیسی میں تبدیلی لانے کی ہدایت کردی۔
اجلاس میں فیصلہ کیا گیا کہ یکم نومبر سے کسی پرانے منصوبے کی مرمت کے نام پر پیسے جاری نہیں ہوں گے، سیکریٹری مواصلات، چیئرمین این ایچ اے اور سینئر افسران پر مشتمل اعلیٰ اختیاراتی بورڈ تشکیل دیدیا گیا۔وفاقی وزیر نے کہا کہ آئندہ این ایچ اے کے ہر نئے منصوبے پر بورڈ فیصلہ کرے گا، محکمے میں کسی کو مالی بے ضابطگی اور بے ایمانی نہیں کرنے دیں گے، افسران یا کنٹریکٹرز کو غیرضروری اضافی فنڈز نہیں ملیں گے۔عبدالعلیم خان کا کہنا ہے کہ ہر اسکیم نیا منصوبہ ہوگا اور کوئی فرد واحد اس کا فیصلہ نہیں کرے گا۔
وفاقی وزیر مواصلات نے بوگس اور عرصہ دراز سے زیر التواء منصوبوں کا سخت نوٹس لیتے ہوئے کہا کہ افسران چیئرمین این ایچ اے کو منصوبوں کا بریک اپ پیش کریں، ہر منصوبے کا تھرڈ پارٹی ای ویلیوایشن کا فیصلہ کیا گیا ہے، کسی سے رعایت نہیں ہوگی۔وفاقی وزیر مواصلات کو اجلاس میں این ایچ اے کے اہم منصوبوں اور محکمانہ امور پر رپورٹ پیش کی گئی، ادارے کے سالانہ مینٹی ننس پلان پر تفصیلی بریفنگ بھی دی گئی۔چیئرمین این ایچ اے نے ممبران کو تمام اسکیموں کی رپورٹ 3 دن میں پیش کرنے کی ہدایت کردی، وفاقی سیکریٹری مواصلات نے افسران کو وفاقی وزیر کی ہدایات پر من و عن عمل کرنے کا حکم دیدیا۔
