قطر کے وزیراعظم و وزیرخارجہ شیخ محمد بن عبدالرحمان بن جاسم الثانی نے غزہ پر جاری اسرائیلی بمباری کو جنگ بندی معاہدے کی کھلی خلاف ورزی قرار دیتے ہوئے کہا ہے کہ یہ کارروائیاں نہ صرف افسوسناک بلکہ دل دہلا دینے والی ہیں، جن سے ظاہر ہوتا ہے کہ مشرقِ وسطیٰ میں تمام سرخ لکیریں عبور کی جا چکی ہیں۔
نیویارک میں کونسل آن فارن ریلیشنز کی تقریب سے خطاب میں قطری وزیراعظم نے کہا کہ حالیہ اسرائیلی حملوں نے قطر سمیت پوری عالمی برادری کو ہلا کر رکھ دیا ہے۔ ان کے مطابق اسرائیل نے غزہ میں رہائشی آبادی، تعلیمی اداروں اور حتیٰ کہ سفارتی دفاتر کو بھی نشانہ بنایا، جو بین الاقوامی قوانین کی سنگین خلاف ورزی ہے۔شیخ محمد نے کہا کہ حماس نے غزہ میں اقتدار چھوڑنے کی آمادگی ظاہر کی ہے تاکہ خطے میں پائیدار امن کی راہ ہموار ہو سکے، تاہم اسرائیلی فوج کی کارروائیاں جنگ بندی کی روح کے منافی ہیں اور ان واقعات نے قطر کو شدید مایوسی اور صدمے سے دوچار کیا ہے۔
انہوں نے بتایا کہ قطر اور دیگر ثالث ممالک جنگ بندی کے تسلسل کے لیے سرگرم ہیں اور دونوں فریقوں کو معاہدے کی پاسداری پر آمادہ کرنے کی کوششیں جاری رکھے ہوئے ہیں۔قطری وزیراعظم نے یقین دلایا کہ قطر جنگ بندی کے استحکام کے لیے اپنی تمام تر توجہ اور کوششیں جاری رکھے گا۔واضح رہے کہ تازہ اسرائیلی بمباری میں ایک ہی دن میں 46 بچوں اور 20 خواتین سمیت 104 فلسطینی شہید ہوئے، جس پر عالمی سطح پر بھی شدید ردعمل سامنے آیا ہے۔
سابق کپتان یونس خان نے اپنا میڈیا ہاؤس قائم کرلیا
شہباز شریف کا ترک قومی دن پر اظہارِ یکجہتی، کہا ہر مشکل وقت میں پاکستان کے ساتھ رہا
کراچی میں ای چالان مہم ، 11 ہزار سے زائد چالان، 5 کروڑ سے زائد جرمانے
