کالعدم ٹی ایل پی کے ٹکٹ ہولڈرز کا پارٹی سے علیحدگی کا اعلان

کالعدم تحریک لبیک پاکستان (ٹی ایل پی) کے ٹکٹ ہولڈرز نے جماعت سے دستبرداری کا اعلان کردیا ہے۔
لاہور اور سینٹرل پنجاب سے کالعدم تحریک لبیک کے ٹکٹ ہولڈرز نے پارٹی سے علیحدگی کا اجتماعی اعلان کیا،لاہور میں تحریک لبیک پاکستان (ٹی ایل پی) کے سابق ٹکٹ ہولڈرز نے پریس کانفرنس کرتے ہوئے اعلان کیا ہے کہ وہ جماعت سے دستبردار ہو رہے ہیں،پریس کانفرنس سے خطاب کرتے ہوئے بیرسٹر عثمان خضر مانگٹ نے کہا ہے کہ ریاست پر حملہ کرنا کسی بھی طور مناسب نہیں،غیر معمولی صورتحال میں ریلی نکالنا انتہائی ناجائز قدم تھا، اگر ریاست کو خطرہ ہو گا تو میری سیاست کا کوئی فائدہ نہیں، کیونکہ ریاست کے ساتھ سیاست نہیں ہو سکتی،مسلح جتھوں نے اسکول کے بچوں کی وین چھینی اور نجی و سرکاری املاک کو نقصان پہنچایا، وہ ریاستِ پاکستان کے ساتھ کھڑے ہیں اور پرتشدد مظاہروں کی شدید مذمت کرتے ہیں، ریاست پر حملہ کر کے کوئی جماعت سیاست نہیں کر سکتی۔