ننکانہ صاحب (باغی ٹی وی، نامہ نگاراحسان اللہ ایاز) بابا گورو نانک دیو جی کے 556ویں گرپرب کی تقریبات کے موقع پر بابا گورو نانک یونیورسٹی ننکانہ صاحب کے والنٹیئرز ڈاکٹر رضوان علی کی نگرانی میں یاتریوں کی خدمت اور رہنمائی کے فرائض بخوبی انجام دے رہے ہیں۔
یونیورسٹی کی والنٹیئرز ٹیم اندرون ملک اور بیرون ملک سے آئے سکھ یاتریوں کو معلومات، رہائش اور انتظامی امور میں رہنمائی فراہم کر رہی ہے۔والنٹیئرز کی خوش اخلاقی، تعاون اور خدمت کا جذبہ یونیورسٹی کی اقدارِ رواداری، ہم آہنگی اور انسانیت دوستی کی عکاسی کرتا ہے۔
ڈاکٹر رضوان علی نے کہا کہ یونیورسٹی کے طلبہ نے ذمہ داریاں جذبے اور پیشہ ورانہ انداز میں نبھائیں۔ ان سرگرمیاں بین المذاہب ہم آہنگی کو فروغ دیتی ہیں اور امن، رواداری و بھائی چارے کے پیغام کو عام کرنے میں مددگار ہیں۔
گرپرب کے دوران یونیورسٹی انتظامیہ اور والنٹیئرز کی جانب سے یاتریوں کو بہترین سہولیات فراہم کرنے کا سلسلہ جاری ہے۔
