کراچی (باغی ٹی وی، ڈاکٹر بشیر بلوچ کی رپورٹ) کراچی کے مختلف علاقوں میں پولیس نے مبینہ مقابلوں اور کارروائیوں کے دوران چار زخمیوں سمیت 6 ملزمان کو گرفتار کر لیا۔ گرفتار ملزمان کے قبضے سے اسلحہ، مسروقہ سامان اور موٹر سائیکلیں برآمد کی گئیں۔
قائد آباد پولیس نے داود چالی کے قریب کارروائی کرتے ہوئے سٹریٹ کرائم میں ملوث ملزم کو گرفتار کیا، ملزم کے قبضے سے اسلحہ اور موبائل فونز برآمد ہوئے۔
ابراہیم حیدری پولیس نے علی اکبر چڑہائی کے قریب فائرنگ کے تبادلے کے بعد ایک ملزم کو زخمی حالت میں گرفتار کیا، جبکہ اس کا ساتھی فرار ہو گیا۔ ملزم کے قبضے سے اسلحہ، نقد رقم اور دیگر سامان برآمد ہوا۔
بن قاسم پولیس نے مہران ہائی وے کے قریب فائرنگ کے تبادلے کے بعد ایک ملزم کو زخمی حالت میں گرفتار کیا، اس کا ساتھی موقع سے فرار ہو گیا۔ گرفتار ملزم کے قبضے سے اسلحہ، موٹر سائیکل، موبائل فونز اور نقد رقم برآمد ہوئی۔
بوٹ بیسن پولیس نے اتوار بازار کے قریب مبینہ مقابلے کے بعد دو زخمیوں سمیت تین ملزمان کو گرفتار کیا، ملزمان کے قبضے سے اسلحہ اور چھینا ہوا سامان برآمد ہوا۔
پولیس نے گرفتار تمام ملزمان کے خلاف مختلف مقدمات درج کر کے مزید قانونی کارروائی شروع کر دی ہے۔
