ٹھٹھہ (بلاول سموں) عدالت کی تحویل میں موجود قیدی بشیر عرف دیو گندرو نے پہلی منزل سے چھلانگ لگا کر فرار ہونے کی کوشش کی، جس کے نتیجے میں وہ زخمی ہوگیا۔ پولیس نے فوری طور پر کارروائی کرتے ہوئے اسے شدید زخمی حالت میں سول اسپتال مکلی منتقل کیا۔
پولیس کے مطابق قیدی بشیر عرف دیو ولد عثمان گندرو، جس کے خلاف تھانہ ٹھٹھہ میں مقدمہ نمبر 122/2025 دفعہ 3/4 منشیات آرڈیننس کے تحت چالان کیا گیا تھا، بدین جیل سے قیدی پارٹی کے ہمراہ پیشی کے لیے لایا گیا تھا۔ پیشی کے دوران اس نے فرار ہونے کی نیت سے پہلی منزل سے چھلانگ لگائی۔
ترجمان پولیس نے بتایا کہ فرار کی کوشش ناکام بناتے ہوئے قیدی کو دوبارہ حراست میں لے لیا گیا، جب کہ ڈاکٹرز کے مطابق اسے معمولی چوٹیں آئی ہیں اور ہڈیوں کو کوئی سنگین نقصان نہیں پہنچا۔
