لاہور ہائیکورٹ نے جوئے کی ایپلیکشنز کی پروموشن کے مقدمے میں ملوث یوٹیوبر سعد الرحمان عرف ڈکی بھائی کی درخواست ضمانت منظور کرلی۔
لاہور ہائیکورٹ نے یوٹیوبر سعد الرحمان عرف ڈکی بھائی کی درخواست ضمانت منظور کرتے ہوئے 10 لاکھ روپے کے مچلکے جمع کرانے کی ہدایت کردی۔جسٹس شہرام سرور چوہدری نے سعد الرحمان کی ضمانت بعد از گرفتاری پر سماعت کی، این سی سی آئی اے نے ملزم کے خلاف مقدمہ درج کر رکھا ہے۔
یہ مقدمہ 13 جون کی ایک انکوائری کے بعد درج کیا گیا تھا، جس میں اطلاع ملی تھی کہ کچھ یوٹیوبرز اور سوشل میڈیا انفلوئنسرز اپنے مالی فائدے کے لیے عوام میں جوا اور بیٹنگ ایپلیکیشنز کی تشہیر کر رہے ہیں۔این سی سی آئی اے کی حراست میں ڈکی بھائی 22 دن تک رہے۔ انہیں 3 ستمبر کو آخری ریمانڈ دیا گیا تھا جو 5 ستمبر کو ختم ہوا، جس کے بعد 9 ستمبر کو عدالتی ریمانڈ پر جیل بھیج دیا گیا۔ اسی دوران ان کی قانونی ٹیم نے ضمانت کے لیے درخواست دائر کی تھی جو مسترد کر دی گئی تھی جس کے بعد لاہور ہائیکورٹ میں درخواست ضمانت دائر کی گئی تھی.
