سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ سندھ حکومت کی سنجیدہ اور فعال پالیسی کے تحت کراچی میں اس وقت 756ترقیاتی اسکیمیں جاری ہیں جن کا مقصد شہر کے بنیادی ڈھانچے کو مضبوط اور جدید بنانا ہے
شرجیل میمن کا کہنا تھا کہ کراچی سندھ کا دل اور ہماری اولین ترجیحات میں شامل ہے،کراچی میں ہمارا کام بولتا ہےاربوں روپے کے منصوبے جاری ہیں، 756 ترقیاتی منصوبے سندھ حکومت کی عوام دوست ترجیحات اور شفاف حکمرانی کا ثبوت ہیں شہریوں کو بہتر سہولیات کی فراہمی ہمارا عزم ہے،کراچی ڈویلپمنٹ اتھارٹی (کے ڈی اے) کی 76 ترقیاتی اسکیموں پر 13 ارب روپے کی لاگت سے کام جاری ہے، جبکہ کراچی میٹروپولیٹن کارپوریشن (کے ایم سی) کی 200 اسکیموں پر 18.36 ارب روپے خرچ کیے جا رہے ہیں، حکومت شہر کو جدید، محفوظ اور سہولیات سے آراستہ بنانے کے لیے تمام دستیاب وسائل استعمال کر رہی ہے، صوبائی حکومت اہم منصوبوں پر تیزی سے کام کر رہی ہے تاکہ شہر کا انفراسٹرکچر موجودہ دور کی ضروریات کے مطابق بنایا جا سکے۔
شرجیل انعام میمن کا کہنا تھا کہ ان منصوبوں کی تکمیل شہریوں کے لیے بڑی سہولت کا باعث بنے گی، اور چیلنجز کے باوجود کوشش کی جا رہی ہے کہ تمام کام مقررہ مدت کے اندر مکمل کیے جائیں۔
