اوکاڑہ (نامہ نگار ملک ظفر)ڈپٹی کمشنر احمد عثمان جاوید کی ہدایت پر گھوڑے شاہ قبرستان کے اطراف قائم تجاوزات کے خلاف بھرپور آپریشن کیا گیا۔ کارروائی سب ڈویژنل انفورسمنٹ آفیسر وسیم جاوید کی زیر نگرانی عمل میں لائی گئی۔
آپریشن کے دوران قبرستان کی چار دیواری سے متصل تمام غیر قانونی تجاوزات ہٹا دی گئیں۔ سب ڈویژنل انفورسمنٹ آفیسر وسیم جاوید نے واضح کیا کہ قبرستانوں کے اطراف کسی بھی قسم کی غیر قانونی تعمیر، قبضہ یا تجارتی سرگرمی ہرگز برداشت نہیں کی جائے گی۔
انہوں نے شہریوں کو تنبیہ کرتے ہوئے کہا کہ آینده قانون کی خلاف ورزی کی صورت میں سخت کارروائی عمل میں لائی جائے گی۔ ان کا کہنا تھا کہ یہ آپریشن ایک روزہ کارروائی نہیں بلکہ تجاوزات کے مکمل خاتمے تک جاری رہے گا۔
وسیم جاوید نے عوام سے اپیل کی کہ وہ قبرستانوں کے تقدس کا خیال رکھیں اور کسی بھی قسم کی غیر قانونی سرگرمی سے اجتناب کریں۔ انہوں نے اس عزم کا اظہار کیا کہ شہر میں نظم و ضبط اور مقدس مقامات کے احترام کو ہر صورت یقینی بنایا جائے گا۔
