الیکشن کمیشن نے ضمنی انتخابات میں قومی اسمبلی کے 5 اور صوبائی اسمبلی کے 7 حلقوں سے منتخب امیدواروں کی کامیابی کے نوٹیفکیشن جاری کردیے۔
الیکشن کمیشن آف پاکستان نے طلال چوہدری کی جانب سے انتخابی ضابطہ اخلاق کی خلاف ورزی پر این اے 96 سے ان کے بھائی بلال چوہدری کی کامیابی کا نوٹیفکیشن روک دیا۔الیکشن کمیشن آف پاکستان نے 23 نومبر کو ہونیوالے قومی و صوبائی اسمبلی کے ضمنی انتخابات کے نتائج کے بعد نوٹفکیشن جاری کردیئے۔ای سی پی کے نوٹیفکیشن کے مطابق این اے 18ہری پور سے بابر نواز خان کامیاب، این اے 104 فیصل آباد سے دانیال احمد فاتح قرار، این اے 129 لاہور سے محمد نعمان کامیاب قرار پائے ہیں۔ای سی سی پی نے این اے 143 ساہیوال سے محمد طفیل کو کامیاب قرار دیا جبکہ این اے 185 ڈیرہ غازی خان سے محمود قادر خان کامیاب ہوگئے۔
الیکشن کمیشن کی جانب سے پی پی 73 سرگودھا سے میاں سلطان علی رانجھا، پی پی 87 میانوالی سے علی حیدر نور اور پی پی 98 فیصل آباد سے آزاد علی تبسم کی کامیابی کا نوٹیفکیشن جاری کیا گیا۔ای سی پی کے نوٹیفکیشن کے مطابق پی پی 115 فیصل آباد سے محمد طاہر پرویز، پی پی 116 فیصل آباد سے احمد شہیر، پی پی 203 ساہیوال سے محمد حنیف اور پی پی 269 مظفرگڑھ سے میاں علمدار عباس قریشی کامیاب قرار پائے ہیں۔
