وزیر اعلیٰ پنجاب مریم نواز نے کہا ہے کہ پنجاب کے ہر مرلے، ہرکنال اور ہر ایکڑ پر صرف اصل مالک کا ہی قبضہ ہوگا، زمین یا پراپرٹی پر قبضے سے متعلق ڈپٹی کمشنر آفس میں درخواست دیں، دنوں میں فیصلہ ہوگا۔
وزیر اعلیٰ پنجاب مریم نواز کی سربراہی میں اجلاس ہوا جس میں پراپرٹی آرڈیننس کے مؤثر نفاذ پر وزیر اعلیٰ کو تفصیلی بریفنگ دی گئی،بریفنگ میں بتایا گیا کہ ایک ہزار 5 خاندانوں کو 48 گھنٹوں میں زمین کی ملکیت کا حق واپس مل گیا ہے، اب پنجاب میں خواتین کے زمین کے مقدمات اولین ترجیح پر حل کیے جائیں گے،وزیر اعلیٰ پنجاب مریم نواز کا کہنا تھا کہ زمین کا اصل مالک جب تک قبضہ نہ لے فیصلہ ادھورا ہے، فیصلہ صرف کاغذ پر نہیں ہوگا۔ پنجاب کے ہرمرلے، ہرکنال اور ہرایکڑ پر صرف اور صرف اصل مالک کا ہی قبضہ ہوگا، شہری زمین یا پراپرٹی پر قبضے سے متعلق ڈی سی آفس میں درخواست دیں، دنوں میں فیصلہ ہوگا،زمین کے مقدمات میں فیصلے پر فوری قبضہ دیا جائےگا،کوئی سفارش نہیں چلےگی۔
