اپنے بچے کوکورونا سے بچانے کےلیےتین سال گھرمیں بندرکھنےوالی ماں تک پولیس پہنچ گئی

گروگرام:بھارتی شہر گروگرام میں پولیس نے کرونا سے موت کے خوف میں مبتلا ایک خاتون کو بچے سمیت فلیٹ سے بازیاب کرلیا، جو 3 سال سے اپنے گھر میں بند تھے۔بھارتی میڈیا کے مطابق ایک پولیس افسر نے بتایا کہ 33 سالہ مُن مُن ماجھی نے 3 سال پہلے خود کو اپنے 7 سالہ بیٹے سمیت فلیٹ میں اس لئے بند کرلیا تھا کیونکہ خاتون کو ڈر تھا کہ ان کا بیٹا گھر سے باہر نکلتے ہی کرونا وائرس کی وجہ سے مرجائے گا۔

رپورٹ کے مطابق تقریباً ایک ہفتہ قبل گروگرام پولیس کے پاس سوجن ماجھی نامی ایک شخص آیا اور اس نے بتایا کہ اس کی بیوی نے 3 سال سے خود کو اور اپنے بیٹے کو کرونا وائرس کے ڈر سے گھر میں بند کر رکھا ہے۔

بھارتی میڈیا کا کہنا ہے کہ سوجن ماجھی نے پولیس کو بتایا کہ بھارت میں کرونا وائرس کی وجہ سے عائد پابندیاں ختم ہونے کے بعد وہ اپنے دفتر گئے اور اس کے بعد ان کی بیوی نے انہیں گھر میں داخل نہیں ہونے دیا۔سوجن ماجھی کے مطابق وہ بے گھر ہونے کے بعد سے فلیٹ کا کرایہ، گیس و بجلی کے بل دے رہے اور گھر میں استعمال ہونیوالا سامان بھی دروازے پر رکھ کر آجاتے ہیں۔

خاتون کو گھر سے نکلنے پر راضی کرنے والے گروگرام پولیس کے افسر کا کہنا ہے کہ انہوں نے پہلے سوجن ماجھی کی کہانی پر یقین نہیں کیا لیکن جب مُن مُن ماجھی کو ٹیلی فون کیا گیا تو انہیں پتہ چلا کہ خاتون اور بچہ دونوں فلیٹ میں خیریت سے ہیں۔ پولیس افسر نے میڈیا کو بتایا کہ خاتون کو انہیں ویڈیو کال کی اور جب میں نے بچے کو دیکھا تو میں جذباتی ہوگئی، اس کے بال بڑے ہوکر کندھے تک آرہے تھے۔ رپورٹ کے مطابق خاتون کے ساتھ موجود بچہ اب 10 سال کا ہوچکا ہے اور پچھلے 3 سالوں میں اس نے اپنی ماں کے علاوہ کسی اور انسان سے ملاقات نہیں کی اور وہ تنہائی کا احساس مٹانے کیلئے گھر کی دیواروں پر پینسل سے تصاویر اور کارٹون بناتا رہا ہے۔

گروگرام میں تعینات پولیس افسر نے بتایا کہ کرونا وائرس کی وجہ سے خاتون خوف کا شکار تھی، جب اس سے بات کی گئی تو اس نے کہا کہ میں اپنے بیٹے کو گھر سے باہر نکلنے نہیں دوں گی کیونکہ جیسے ہی وہ باہر نکلے گا فوراً مرجائے گا۔ پولیس افسر کا کہنا ہے خاتون کو بلایا تو وہ اکیلے پولیس اسٹیشن آگئی، جسے ڈاکٹر کے پاس جانے پر راضی کیا گیا، جب خاتون ڈاکٹر کے پاس گئی تو پولیس نے اس کے گھر جاکر بچے کو وہاں سے نکال لیا۔ پولیس کے مطابق خاتون کے گھر میں کچرے کا انبار لگا ہوا تھا کیونکہ 3 سالوں سے انہوں نے کچرا بھی گھر سے باہر نہیں پھینکا تھا۔