چوہدری ذوالفقار علی اولکھ شعبہ زراعت مرکزی مسلم لیگ کے صدر مقرر،اجلاس میں فیصلہ
پاکستان مرکزی مسلم لیگ کے صدر خالد مسعود سندھو نے کہا ہے کہ پارلیمانی قومی سلامتی کمیٹی کا دہشت گردی کیخلاف اعلامیہ کا خیر مقدم کرتے ہیں تا ہم اب اعلامیوں سے آگے بڑھ کر فیصلہ کن کردار ادا کرنے کی ضرور ت ہے، دہشت گردی کے خلاف جنگ متحد ہو کر ہی کامیابی سے جیتی جا سکتی ہے.23 مارچ کو یوم امن منانے کا اعلان کیا جائے.مرکزی مسلم لیگ عید کے بعد دہشت گردی کے خلاف ،اور امن کےقیام کیلیے وسیع پیمانے پر مہم چلائے گی.
ان خیالات کا اظہار انہوں نے مرکزی مسلم لیگ کے اجلاس کے دوران گفتگو کرتے ہوئے کیا،اجلاس میں جوائنٹ سیکرٹری انجینئر حارث ڈار، مرکزی ترجمان تابش قیوم، صدر پنجاب چوہدری محمد سرور ، چوہدری ذوالفقار علی اولکھ نے شرکت کی، اجلاس میں چوہدری ذوالفقار علی اولکھ کوشعبہ زراعت مرکزی مسلم لیگ کا صدر مقرر کیا گیا،رہنماؤں نے نیک تمناؤں کا اظہار کیا اور امید ظاہر کی کہ چوہدری ذوالفقار علی اولکھ زرعی شعبے کی بہتری کے لیے مؤثر کردار ادا کریں گے۔ چوہدری ذوالفقار علی اولکھ نے مرکزی مسلم لیگ کے قائدین کا شکریہ ادا کیا اور کہا کہ وہ مرکزی مسلم لیگ کی قیادت کی امیدوں پر پورا اتریں گے،
خالد مسعود سندھو کا کہنا تھا کہ پارلیمانی قومی سلامتی کمیٹی کے اجلاس کے بعدصرف اعلامیہ جاری ہونا کافی نہیں، دہشت گردوں و سہولت کاروں کیخلاف فیصلہ کن آپریشن کی ضرورت ہے،ہم چاہتے ہیں کہ پاکستان امن کا گہوارہ بنے اور معاشی استحکام آئے،دہشت گردی کا خاتمہ اس وقت ایک چیلنج بن چکا ہے،آئے روز بم دھماکے، علما کرام کی ٹارگٹ کلنگ نے شہریوں کو خوف میں مبتلا کر رکھا ہے،دہشتگردوں کے خلاف آپریشن پر پاکستانی قوم سیکورٹی فورسز کے شانہ بشانہ کھڑی ہے.پاکستان مرکزی مسلم لیگ عید کے بعد قیام امن کے لئے سیاسی جماعتوں کو ساتھ ملا کر ملک گیر مہم چلائے گی.
