آج کا دن دشمن کو مکا دکھانے کا ہے،ماضی کی نسبت زیادہ مضبوط ہیں، سراج الحق

امیر جماعت اسلامی سینیٹر سراج الحق نے کہا ہے کہ ہمارے بہادر افواج نے بھرپور انداز میں دشمن کو شکست دی ،ہمارے شہریوں نے بھی پاک فوج کیساتھ جانوں کا نذرانہ پیش کیا ،آج ہم دشمن کو پیغام دینے یہاں جمع ہیں کہ ہم اب ماضی کی نسبت زیادہ مضبوط ہیں ،اب اگر بھارت نے کوئی مہم جوئی کی تو بھرپور جواب ملے گا

باغی ٹی وی کی رپورٹ کے مطابق سینیٹر سراج الحق نے یادگار شہداء پر حاضری دی ، اس موقع پر ان کا کہنا تھا کہ پاکستانی اپنے ملک پر جان دینا فخر اور اعزاز سمجھتا ہے ،پاکستان ہمارے لئے اللہ کی نعمت اور امانت ہے ،ہم اس نعمت کی حفاظت کریں گے ،آج انڈیا نے مقبوضہ کشمیر میں 33 روز سے جیل خانہ بنا رکھا ہے ،مقبوضہ کشمیر کی ساری قیادت جیل میں اور بچے ہسپتالوں میں ہیں ،مقبوضہ کشمیر کے لوگ مساجد میں نہیں جاسکتے, شہداء کی تدفین نہیں کرسکتے ،آج مقبوضہ کشمیر کربلا بن چکا ہے ،کشمیری مائیں اور بہنیں آج پاک فوج اور حکمرانوں کی طرف دیکھ رہی ہیں.

سراج الحق کا مزید کہنا تھا کہ آج کا دن عزم اور غیرت کا دن ہے ،آج کا دن دشمن کو مکا دکھانے کا ہے ،آج بھارت تقسیم ہے مگر الحمداللہ پاکستان اپنی سرزمین کے دفاع میں متحد ہے ،ہم انشاءاللہ ان شہیدوں کے قدم پر چل کر اپنے ملک کو محفوظ کریں گے ،ہم پاکستان کو دنیا کا خوشحال ملک بنائیں گے