سعد فاروق
چیئرمین پیپلز پارٹی بلاول بھٹو زرداری نے عالمی برادری سے مسئلہ کشمیر کے حل کیلئے کردار ادا کرنے کی اپیل کی ہے۔
غیر ملکی میڈیا کو دیئے گئے انٹرویو میں بلاول بھٹو زرداری نے کہا کہ یہ جاننا ضروری ہے کہ کون سا میڈیا عوام کو گمراہ کر رہا ہے۔ سچ یہ ہے کہ بھارت جنگ ہار چکا ہے۔انہوں نے کہا کہ یہ بھی سوچنے کی بات ہے کہ کس حکومت نے تنازع کے دوران اور بعد میں جھوٹ بولا؟ پاکستان نے مجموعی طور پر بھارت کے 6 جنگی طیارے مار گرائے۔
بلاول بھٹو نے کہا کہ ہم مستقل جنگ بندی کے خواہاں ہیں اور عالمی برادری سے اپیل کرتے ہیں کہ وہ اس حوالے سے اپنا کردار ادا کرے۔ پاکستان ہمیشہ مذاکرات کیلئے تیار رہا ہے، لیکن بھارت کی جانب سے انکار موجودہ حالات کو غیر موزوں ظاہر کرتا ہے۔
انہوں نے مزید کہا کہ بھارتی ہٹ دھرمی کے باعث ہم عالمی برادری سے مسلسل رابطے میں ہیں، تاکہ خطے میں امن قائم رکھا جا سکے۔ عالمی برادری کو نہ صرف قیام امن بلکہ مسئلہ کشمیر کے حل کے لیے بھی فعال کردار ادا کرنا ہوگا۔
