عالمی شہرت یافتہ ڈھولچی گونگا سائیں انتقال کر گئے

لاہور:عالمی شہرت یافتہ ڈھول پلیئر گونگا سائیں حرکت قلب بند ہونے کے باعث انتقال کرگئے گونگا سائیں ملکی اور بین الاقوامی فیسٹولز میں کارکردگی کامظاہرہ کرتے تھے

باغی ٹی وی : پاکستان کے معروف ڈھولچی گونگا سائیں حرکت قلب بند ہونے کے باعث انتقال کرگئے گونگا سائیں کی نماز جنازہ 11 بجے سبزہ زار لیاقت چوک کے قریب ادا کیا جائے گی-

گونگا سائیں کے مینجر ثقلین کے مطابق گونگا سائیں کی تدفین ٹھوکر نیاز بیگ کے قبرستان میں ہوگی-

گونگا سائیں عالمی شہرت یافتہ ڈھولچی تھے جو پپو سائیں کے ہمراہ اپنے فن کا مظاہرہ کرتے رہے ،گونگا سائیں اور پپو سائیں نے اپنے اس طرز موسیقی و رقص کو نہایت کامیابی سے یورپ میں جرمنی، سوئٹزرلینڈ اور برطانیہ کے صوفی حلقوں میں روشناس کرایا ۔ وہ تقریباً تمام مسلم ممالک اور امریکہ میں اپنے فن کا مظاہرہ کر چکے ہیں۔

گونگا سائیں کی وجہ شہرت صوفی طرز کے ڈھول کی تھاپ پر دیوانہ وار رقص تھا۔ یہ رقص وہ خود ہی ڈھول بجاتے ہوئے کرتے اور ان کا یہ لازوال مظاہرہ ہر جمعرات کو شاہ جمال کے مزار پر سینکڑوں لوگ دیکھنے آتے تھے-

اس فن میں مہارت پر حال ہی میں گونگا سائیں اور پپو سائیں کو بی بی سی کے عالمی مقابلے میں بہترین جنوبی ایشیائی موسیقی کا انعام بھی دیا گیا ہے-