اسلام آباد: رواں مالی سال اب تک پاکستان کو بیرونی فنانسنگ سے ایک ارب 72کروڑ ڈالر موصول ہوئے-
باغی ٹی وی : اقتصادی امور ڈویژن نے بیرونی فنانسنگ سے متعلق رپورٹ جاری کر دی جس میں بتایا گیا ہے کہ مالی سال کے پہلے 4 ماہ میں پاکستان کو ایک ارب 72کروڑ ڈالر موصول ہوئے رواں مالی سال بیرون ممالک سے مجموعی 19 ارب 39 کروڑ ڈالر ملنے کا تخمینہ لگایا گیا ہے جبکہ سالانہ ہدف کے مقابلے میں جولائی تا اکتوبر 8.88 فیصد فنڈز ہی حاصل ہو سکے، پاکستان کو 4 ماہ میں آئی ایم ایف سے ملنے والے ایک ارب ڈالر اس کے علاوہ ہیں۔
اقتصادی امور ڈویژن کی دستاویزات کے مطابق جولائی تا اکتوبر مجموعی طور پر 2 ارب 72کروڑ ڈالر کی بیرونی مالی معاونت ملی، پاکستان کو اس دوران مختلف ممالک سے 25 کروڑ 98 لاکھ ڈالر حاصل ہوئے جبکہ دیگر عالمی مالیاتی اداروں نے پاکستان کو 72 کروڑ ڈالر سے زائد فراہم کیے،پاکستان نے جولائی تا اکتوبر 20 کروڑ ڈالر کا کمرشل قرضہ بھی لیا جبکہ نیاپاکستان سرٹیفکیٹ میں چار ماہ کے دوران 54 کروڑ 21 لاکھ ڈالر کی سرمایہ کاری آئی،رواں مالی سال 9 ارب ڈالر کے چینی اور سعودی ڈپازٹس میں توسیع ملنے کا امکان ہے، اس میں سعودی عرب کے 5 ارب ڈالر اور چین کے 4 ارب ڈالر کے ڈپازٹس شامل ہیں۔