دہشت گردی کے خلاف پوری قوم اور سیاسی و عسکری قیادت متحد ہے،حافظ خالد نیک
پاکستان مرکزی مسلم لیگ کے ڈپٹی سیکرٹری جنرل حافظ خالد نیک نے باجوڑ بم دھماکے کی مذمت کرتے ہوئے کہا ہے کہ معصوم انسانی جانوں کا ضیاع ایک ناقابل معافی جرم ہے۔اسسٹنٹ کمشنر فیصل اسماعیل سمیت دیگر اہلکاروں کی شہادت ایک قومی سانحے سے کم نہیں، شہداء کے اہل خانہ سے دلی ہمدردی اور تعزیت کا اظہار کرتے ہیں.
حافظ خالد نیک کا کہنا تھا کہ باجوڑ دھماکے میں اسسٹنٹ کمشنر ناوگئی، تحصیلدار ناوگئی وکیل، ایک پولیس صوبیدار اور پولیس اہلکار سمیت قیمتی جانوں کا نقصان ہوا،پاکستان میں دہشت گردی کی لہر بڑھ رہی ہے اور خیبر پختونخوا و بلوچستان دشمن قوتوں کا ہدف رہا ہے،دہشت گردی کے خلاف جنگ میں سب سے زیادہ قربانیاں انہی علاقوں کی عوم نے دی ہیں، دہشت گردی کے خلاف پوری قوم اور سیاسی و عسکری قیادت متحد ہے، مرکزی مسلم لیگ وطن عزیز کو امن کا گہواہ بنانے کے لئے میدان عمل میں ہے، نفرت کی سیاست،انتشار، دہشتگردی کے خاتمے کے لئے اتحاد و یکجہتی ضروری ہے،ہم اس مشکل وقت میں شہداء کے لواحقین کے ساتھ کھڑے ہیں اور اللہ تعالیٰ سے دعاگو ہیں کہ وہ شہداء کو اعلیٰ درجات عطا فرمائے اور زخمیوں کو جلد صحتیابی نصیب کرے۔
