ڈیرہ غازی خان(سٹی رپورٹرجواد اکبر) ایڈیشنل ڈپٹی کمشنر ریونیو (اے ڈی سی آر) عثمان بخاری نے ایک اہم اجلاس کی صدارت کرتے ہوئے ریونیو افسران کو کام میں مزید بہتری لانے کی ہدایت جاری کی ہے۔ اجلاس میں اسسٹنٹ کمشنرز سمیت تمام متعلقہ افسران نے شرکت کی۔
اجلاس کا بنیادی مقصد ریونیو کے مختلف امور جیسے کہ سرکاری واجبات کی وصولی، ریونیو ریکارڈ کی ڈیجیٹلائزیشن، آن لائن سسٹم، اور زیر التواء مقدمات کا تفصیلی جائزہ لینا تھا۔ عثمان بخاری نے افسران پر زور دیا کہ وہ ان تمام کاموں کو بروقت مکمل کریں تاکہ عوامی مسائل کا فوری حل ممکن ہو سکے۔
انہوں نے مزید کہا کہ سرکاری واجبات کی وصولی کے عمل کو تیز کیا جائے اور ریونیو ریکارڈ کی ڈیجیٹلائزیشن کو مزید شفاف اور مؤثر بنایا جائے۔ اس کے علاوہ، زیر التواء مقدمات کو جلد از جلد نمٹانے اور اس کی رپورٹ پیش کرنے کا بھی حکم دیا گیا۔
